له بيت الله مسيد سره د پاکستاني مقاماتو د سولې تړون لويديځ او کابل اندېښمن کړى و

بيت الله مسيد ويلي دي چې د سولې دغه دريځ ځکه ختموي چې گواکې پاکستاني پوځ د دوى پر ضد پر له پسې له پوځي ځواکه کار اخلي .

دا څرگندونې په داسې وخت کې شوي چې پاکستاني پوځ پېښور ته نژدې په خيبر دره کې د اورپکو پر ضد عمليات پيل کړي دي .

رپوټونه ښيي چې پاکستاني پوځ خيبر درې ته تلونکې لويه لار تړلې او په غرونو کې يې د اورپکو مورچلې په توپونو ويشتي دي .

د بيت الله مسيد له وسله والو طالبانو سره د پاکستاني حکومت د سولې خبرو اترو او تړونونو لويديځ او کابل اندېښمن کړى و .

په دې وروستيو کې د ناټو پوځي قومندانانو ويلي و چې د دغو تړونونو له امله د افغانستان په ختيځ کې پر افغان او نړيوالو ځواکونو بريدونه ډير شوي دي .

وزيرستان ته ورڅيرمه د افغانستان د خوست او پکتيکا واليانو هم څو ځلي دا ادعا وکړه چې په وزيرستان کې د پاکستاني مقاماتو او ځايي طالبانو د سولې تر تړون وروسته پر دوى داسې بريدونه ډير شوي دي چې له پولې پورې غاړې طالبان پکې برخه اخلي .