راب واټسن له لندنه

	په شخصي خبرو کې پوځي سرچينې شکايت کوي چې برتانوي قومندانان ډېرې پيسې نه لري .

له دې سره به په افغانستان کې د برتانوي سرتيرو شميره تر اتو زرو واوړي چې ډيره برخه يې د هلمند په ولايت کې ځاى پر ځاى ده .

د برتانيا د دفاع وزير ډيس براون وايي د افغانستان په سويل کې د طالبانو نوي تاکتيکونه نوې ننگونې پېښوي خو رښتينى پرمختگ شوى دى .

تر دې وړاندې په لندن کې ولسمشر بوش او لومړي وزير گورډن براون په يو گډ خبري کانفرانس کې وويل چې اضافي سرتيري به د افغانستان د پوځ او پوليسو روزنې ته ډير پام کوي .

د ناټو په ځواکونو کې د برتانيوي سرتيرو ډله تر ډيره ځايه له تاوتريخوالي ډک سويلي ولايت هلمند کې ځاى پر ځاى ده .

دوه کاله وړاندې چې له کله دغلته برتانوي سرتيري رسيدلي دوى په پرله پسې ډول له طالبانو سره په سختو جگړو کې ښکېل شوي دي .

که څه هم د زياتو شويو سرتيرو شميره لږه ده خو بيا هم په افغانستان کې د ناټو له ماموريت سره د برتانيا د اوږد مهالي هوډ ښکارندويي کوي .

حال دا چې دغه نور سرتيري د برتانيا په وار دمخه سره خپارۀ شوي وسله وال پوځ باندې لوى فشار واردوي . خو دغه زياتول به په عمل کې کوم بدلون هم راولي که نه ؟

بې له شکه چې برتانوي مامورين په دې باور دي چې په هلمند کې امنيت په رښتيا ورو ورو ښه شوى دى .

بله دا چې طالبان که څه هم لا خطرناکه دي خو ډير کمزوري شوي او نور ستراتيژيک گواښ نه پېښوي .

خو په شخصي خبرو کې پوځي سرچينې شکايت کوي چې برتانوي قومندانان ډير پيسې نه لري ، د ملکي بيا رغاونکو پروژو او د جگړې د همغږي کولو په برخه کې لا هم ستونزې شته .

دغه راز له لويه سره دا شکونه هم لا پر ځاى دي چې په افغانستان کې شاوخوا ٥٠ زره لويديځ سرتيري دومره لوى هيواد ته کافي هم دي که نه .

له افغانستان څخه په دې وروستيو کې د ناټو وتونکي قومندان ويلي و چې دغلته يې ځواکونه پوره اسانتياوې نه لري .