طاهر خان له اسلام اباده

	مشعل به په اسلام اباد کې تر گرځولو وروسته د گاونډي هېواد هندوستان پلازمېنې ډيلي ته يوړل شي .

د اسلام اباد په جناح سپورت ميدان کې به نن (د چارشنبې په ورځ، د اپريل ١٦) د مشعل د گرځولو مراسم جوړ شي چې ولسمشر پرويز مشرف، لومړى وزير سيد يوسف رضا ګيلاني او جگپوړي چارواکي او ډيپلوماتان به پکې ګډون وکړي .

د امنيتي اندېښنو له امله اسلام اباد کې د مشعل د ځغاتسې مېله به په جناح سپورتي ميدان کې ترسره کړاى شي .

وړاندې د پاکستان د المپک د کمېټې چارواکو ويلي وو چې مشعل به د اسلام اباد پر سړکونو تر دووو کيلومېترو پورې وگرځول شي، خو بيا وروسته د امنيتي اندېښنو له امله دغه پلان فسخ کړاى شو .

مشعل تېره شپه ناوخته د خليجي ښار مسقط نه اسلام اباد ته راورسېد، چې په راغلي پلاوي کې ١٧٠ چينايي وګړي شامل دي .

پاکستاني چارواکو د المپيک مشعل د گرځولو په مراسمو کې د ګډون لپاره ددې هېواد د اولمپيک د پخواني لوبغاړي په گډون ٦٥ نور لوبغاړي هم ټاکل شوي دي .

دولتي تلويزيون به دغه مراسم نېغ په نېغه ښکاره کړي .

پاکستاني چارواکو تلويزيوني چينلونو ته ويلي چې د منفي څرګندونو نه ډډه وکړي او په 'تبت' کې د روان کړکېچ په اړه دې خبرونه نه خپروي .

مشعل به په اسلام اباد کې تر گرځولو وروسته د گاونډي هېواد هندوستان پلازمېنې ډيلي ته يوړل شي .

د المپيک د مشعل له پروگرام سره سم به مشعل د نړۍ پر ٢٢ ښارونو وگرځول شي اړ په پاى کې به د راتلونکې اگست مياشتې په شپږمه بېرته د چين بيجنگ ښارته يوړل شي .