الياس وحدت له خوست څخه

	خوست يو له هغو ولايتونو دى چې پوهنتون هم لري خو ښوونځي پکې ډير سوځول شوي او ښوونکي يې گواښل شوي دي

دغلته ښوونکي شکايت لري چې نړيوالو ځواکونو زده کوونکي او ښوونکي نيولي دي .

د دوى په وينا له ټول خوست څخه درې زد کوونکي ، يو سر ښوونکى او يو مفتش د نړيوالو ځواکونو له خوا نيول شوي او دا روښانه نه ده چې ولې نيول شوي دي .

نړيوال ايتلاف تر اوسه په دې باب څه نه دي ويلي .

د دغې کاربندۍ له امله د صبريو د نژدې ١٦ زره زدکوونکيو پر مخ د ښوونځيو دروازې تړلې دي .

د صبريو ولسوالۍ ښوونکي له وسله والو طالبانو هم سر ټکوي او وايي چې هغوى يې گواښوي .

د خوست د ښوونې و روزنې د رياست يوۀ چارواکي چې د خپل نوم له ښوولو يې ډډه کوله بي بي سي پښتو وېبپاڼې ته وويل چې د صبريو ښوونکو له ډيره وخته د کاربندۍ گواښ کاوۀ .

دغه چارواکي دا هم وويل چې وسله والو طالبانو د ځينو ښوونکو کورونو ته لاسي بمونه هم اچولي دي .

د صبريو ولسوالۍ ښوونکي له افغان حکومت او قومي مشرانو غواړي چې داسې شرايط ورته چمتو کړي چې پکې زدکوونکو ته ښوونه وکړاى شي.

د خوست په ولايت کې په تيرو کلونو کې گڼ شمير ښوونځي سوځول شوي دي .

د صبريو په ولسوالۍ کې ټول ١٥ ښوونځي شته خو دا يوه له هغو ولسواليو ده چې ډيره ناامنه وي .