د افغانستان له سوېل ختيځ ولايت پکتيکا نه هم وخت ناوخت د ناراميو خبرونه ورکول کېږي .

د افغانستان په سوېل ختيځو ولايتونو کې د ٢٠٣ تندر قول اردو چارواکو ويلي چې د سه شنبې په ورځ (د مارچ ١) ناوخته د پکتيکا په ارگون ولسوالۍ کې د کمپاين پر موټر چاودنه شوې .

دغه سرچينه وايي چې په چاودنه کې د کمپاين يو موټر بشپړ له منځه تللى او د کمپاين د څلورو سرتېرو وژل کېدو سربېره درې نور ټپيان شوي دي .

کمپاين د هغو افغاني سرتېرو ځانگړې قطعه ده چې له بهرنيو سرتېرو سره په گډه په سرحدي سيمو کې فعاليت کوي .

بل خوا ددې ولايت د وازې خوا په ولسوالۍ کې د پوليسو پر يوه گاډي د ماين په چاودنه کې يو تن پوليس وژل شوى او يو بل ټپي شوى دى .

همدارنگه ددې ولايت د جاني خېلو په ولسوالۍ کې د وسله والو طالبانو د بهرنيو ځواکونو پر اکمالاتي کمپاين بريد کړى چې له امله يې درې اکمالاتي موټر په بشپړ ډول سوځولي دي .

بله پلو د څنگلوري خوست ولايت په صبريو ولسوالۍ کې د بهرنيو ځواکونو د اکمالاتي توکيو يو موټر د مخالفينو له خوا سوځول شوى او موټرچلوونکى يې له ځانه سره بېولى دى .

طالبانو په دې اړه کوم غبرگون نه دى ښوولى .

خو د افغانستان ددفاع وزارت په يوه خپره شوې خبرپاڼه کې ويلي چې د پکتيکا د زيړوک په ولسوالۍ کې يې پنځه کسان شکمن وسله وال او دوه نې وسلې وال مخالفين نيولي دي .

ملي دفاع وزارت دوه ورځې مخکې هم اعلان کړى و، چې د زابل ولايت په شهر صفا ولسوالۍ کې يې لس کسان وسله وال مخالفين وژلي او د کندهار ولايت په مربوطاتو کې يې دوه تنه نيولي دي .