جانتن بيلې له واشنگټن څخه

	کيږي چې د امريکا د دفاع وزير په بې ساري ډول خپل جرمن سيال ته سخت ليک لىکلى دى

ښاغلي گېټس خبردارى ورکړى چې که افغانستان ته نور سرتيري ونه ليږل شي نو ناټو ځواکونه به خپل اعتبار له لاسه ورکړي .

دغه غوښتنه د امريکا د دفاع وزير خپل جرمن سيال ته په يوۀ ليک کې کړې چې د جرمني د يوې ورځپاڼې په وينا په بې سارې ډول سخت ليکل شوى دى .

يو بل ته د ترخې ژبې دا کارول پر داسې يوه مهال شوي چې په افغانستان کې د ناټو د ماموريت پر ناکامېدو اندېښنو زور اخيستى دى.

دا، همداراز پخپله د ناټو دننه د ترينگلتيا وو له څرگندېدو سره يو ځاى شوي دي.

د کاناډا لومړي وزير سټيون هارپر ولسمشر بوش او لومړي وزير گورډن براون دواړو ته اولتيماتوم ورکړى چې که ناټو د افغانستان د جنوب په خورا خطرناکو سيمو کې نور عسکر وانه چوي، کاناډا به په دغه هيواد کې خپل پوځي ماموريت راونغاړي.

امريکا لا له مخکې د نورو ٣٠٠٠ عسکرو د استولو ژمنه کړې ده، خو د ناټو نور هيوادونه او په دې ډله کې فرانسه او جرمني يې هڅولي چې ځانونه وخوځوي.

تر اوسه د ناټو ډېرو غړو افغانستان ته د پاموړ شمېر عسکرو له استولو څخه ډډه کړې ده.

واشنگټن هڅه کړې چې د ناټو له نورو غړو سره په ډاگه له تا ويلو ماويلو نه ځان وساتي، خو د مشرانو جرگې يوې کميټې ته يوۀ جگپوړي امريکايي ډېپلمات ويلي چې "په ناټو کې له خپلو ملگرو نه لا ډېر څه غواړي" او زياته کړې يې ده چې يوازې څو د گوتې په شمېر متحدين په جنوب کې له ياغيانو سره د مقابلې لپاره جنگي عسکر لري .