په کويت کې تر بري وروسته افغان کريکټ لوبغاړو له خپلو مينه والو سره ملي بيرغ ورپاوۀ

دغه سيالۍ په کويت کې ترسره کيږي او د اسيا لس هيوادونه پکې برخه لري .

افغانستان په لومړيو لوبو کې قطر ، نيپال او ماليزيا ته ماتې ورکړې خو له عمان څخه يې لوبه وبايلله .

نيمه پايلوبې سبا کيدونکي دي چې افغانستان پکې له متحدو عربو اماراتو سره سيالي کوي .

د افغانستان د لوبډلې لوبغاړي ريس احمدزي بي بي سي ته وويل چې په نيمه پايلوبو کې به متحد عرب اماراتو سره سيالي اسانه نه وي خو دوى د بري هيله لري .

د ريس احمدزي دليل دا و چې له عمان سره په لوبه کې ماتې د دۀ په وينا افغان لوبغاړي ويښ کړل .

افغانستان په تيرو څو کلونو کې د کريکټ په ډيرو نړيوالو سياليو کې ښه ځليدلى دى خو په پايلوبه يا نيمه پايلوبه کې پاتې راغلى دى .

ريس احمدزى هيله من دى چې دا ځل به له تيرو تجربو گټه واخلي او برى به يې په برخه شي .

دغه سيالۍ د ٢٠\٢٠ اورونو دي چې په دې وروستيو کې په نړۍ کې خورا ډيرې ستايل شوي دي .

د لوبې دواړه غاړې يوازې په ٢٠ اورونو کې منډې جوړوي . څو مياشتې وړاندې په سويلي افريقا کې د دغه ډول سياليو نړيوالې اتلولۍ وشوې چې هند وگټلې .