گومان دا دى چې دغه لوبې به د افغان نجونو د تجربو لپاره خورا گټورې تمامې شي

د افغانستان د نجونو فوتبال لوبډله د پاکستان په بلنه د هغه هيواد د ښځو په فوټبال ليگ کې په لومړي ځل برخه اخلي .

د چارشنبې د ورځې لوبه چې د اسلام اباد په لوبغالي کې وشوه افغان لوبغاړو په يوۀ صفر د بلوچستان د نجونو له لوبډلې وگټله .

افغان لوبغاړو د لوبې په لومړۍ برخه کې گول وکړ او تر پايه يې ښه دفاع وکړه او بريدونه يې هم لرل خو د نورو گولونو په کولو ونه توانيدې .

افغان نجونو په منځلوبو يا کواټر فاينلز کې د پاکستان د نجونو د تير کال اتلې لوبډلې واپډا ته تر پينتاتي هڅو وروسته څلور دوه ماتې ورکړه .

په پايلوبه کې به افغانستان د لاهور يا کراچۍ له لوبډلو سره لوبه کوي چې په دويمه نيمه پايلوبه کې له يو بل سره مخامخې دي .

پاکستان دوه کاله وړاندې د ښځو فوټبال ليگ جوړ کړ او اوس پکې د ښځو فوټبال لوبې ښې غوړيدلې دي .
په افغانستان کې د طالبانو د حکومت له نسکوريدو وروسته د نجونو فوټبال پيل شوى دى .

اوس شا وخوا ٦٠٠ نجونې د افغانستان په ځينو ولايتونو کې په ٢٤ کلبونو کې لوبې کوي چې تر ټولو ډيرې يې په پلازمېنه کابل کې دي .

کابل ١٧ کلبونه لري چې تر ډيره د ليسو نجونو جوړ کړي دي .

د افغانستان د نجونو ملي لوبډلې د ٢٠٠٧ کال په پيل کې جرمني ته سفر درلود چې په فرانکفورت کې يې له ځايي کلبونو سره لوبې هم کړې وې .