په ايران کې د ټولټاکنو تر گټلو وروسته دا افغانستان ته د ښاغلي احمدي نژاد لومړنى سفر بلل شوى دى

دا به له هغه راهيسته چې ښاغلى احمدي نژاد د ولسمشر په توگه ټاکل شوى ، افغانستان ته د دۀ لومړنى سفر وي .

د افغانستان د بهرنيو چارو وزارت په يوه خبر پاڼه کې وايي چې ايران به د دغه سفر په ترڅ کې له افغانستان سره د همکارۍ يو هر اړخيز تړون لاسليکوي .

افغانستان په هيله دى چې له ايراني غاړې سره به د کاري وړتياو د ډيرولو ، د اقتصاد ، کلتور ، ښوونې و روزنې ، کرهڼې او انرژۍ په برخو کې خبرې وکړي .

ايران په افغانستان کې د طالبانو د واکمنۍ له نسکوريدو راهيسته د دغه هيواد د بيا رغاونې لپاره په دوو جلا غونډو کې د څه باندې ٦٠٠ ميليونه ډالرو د مرستو ژمنه کړې ده .

ايران له افغانستان سره ښې اقتصادي اړيکي هم لري چې اوس د دواړو هيوادونو ترمنځ کالنۍ رسمي سوداگري تر نيم ميلارد ډالرو اوړي .

په دې وروستيو کې ځينو افغاني رسنيو نيوکه کړې وه چې د افغانستان او ايران ترمنځ په سوداگرۍ کې انډول نشته .

خو په واشنگټن کې له ولسمشر بوش سره د ښاغلي کرزي د سفر پر وخت د ايران په باب پوښتنو ته د افغان مشر دريځ مثبت و او له تهرانه يې خوښي ښووله .

په کابل کې د بهرنيو چارو وزارت وايي ښاغلى احمدي نژاد دغه سفر د ولسمشر کرزي په بلنه ترسره کوي .