په تيرو ٤٨ ساعتونو کې د شاوخوا ٧٧ وسله والو طالبانو د وژلو خبر ورکړل شوى دى

له بگرام څخه په خپرې شوې يوې خبر پاڼې کې د متحدو ايالاتو په مشرۍ نړيوال ايتلاف ادعا کوي چې د افغانستان د هلمند په ولايت کې يې تر ٥٠ ډير وسله وال طالبان وژلي دي .

د خبر پاڼې په وينا دغه وژنې د هلمند سيند په لويديځ کې هغه مهال وشوې چې دوى گزمه کوله او له وسله والو طالبانو سره مخامخ شول .

دغه نښته چې د ايتلاف په وينا تر ١٢ ساعتونو اوږده وه د کلا گاز په نامۀ کلي سره ونښته او وسله والو طالبانو له بيلا بيلو لوريو د ايتلاف او افغان پوځ پر گزمې بريدونه وکړل .

ايتلاف د نښتې په ترڅ کې له هوايي ځواک څخه هم کار اخيستى خو ټينگار کوي چې د عملياتو پر وخت يې ملکي کسانو ته تاوان نه دى اړولى .

ځينو ځايي خلکو خبري رسنيو ته ويلي چې په دغو پېښو کې دوى ته هم تاوان اوښتى دى .

په تيرو وختونو کې تل تر پوځي عملياتو او هوايي بريدونو وروسته د ملکي کسانو د مرگ ژوبلې رپوټونه خپارۀ شوي دي .

ناتاييد شوي رپوټونه د ځايي خلکو له خولې ادعا کوي چې گواکې په دغو وروستيو عملياتو کې هم ١٦ ملکي کسان وژل شوي دي .

نړيوال ايتلاف په خپله خبر پاڼه کې وايي چې د تيرې يکشنبې له ورځې راهيسته د هلمند په موسى کلا يا ورته نژدې سيمو کې تر ١٦٠ ډير وسله وال طالبان په بيلا بيلو نښتو کې وژل شوي دي .

په کندهار کې د بي بي سي خبريال ميرويس افغان د افغان سرچينو له خولې وايي چې د پرون او نن ( چارشنبې او پنجشنبې ) په هغو نښتو کې چې تر ډيره په هلمند او تر يوۀ ځايه د کندهار په ځينو سيمو کې شوي دي شاوخوا ٧٧ وسله وال طالبان وژل شوي او درې کسه افغان پوليسو پکې ژوند له لاسه ورکړى دى .

په يوۀ بل خبر کې ناټو وايي چې د افغانستان په سويل کې يې د چارشنبې په ورځ د يوې چاودنې له امله يو سرتيرى وژل شوى او دوه نور يې ټپيان شوي دي .

د ناټو له خوا په خپره شوې خبر پاڼه کې د پېښې ځاى او د وژل شوي سرتيري نوم او هيواد نه دى ياد شوى .