راب برانبي له لندن څخه

	٥١ کلنه ميرمن براون د اسامه بن لادن د څلورم زوى دويمه ميرمن شوه

جېني فليکس براون چې په د انگلستان د شمال چيشير اوسيدونکې ده د اسامه بن لادن د زوى عمر بن لادن ميرمن ده .

د برتانوي ورځپاڼو تر مخه ميرمن براون له عمر بن لادن سره په مصر کې هغه مهال په لومړي ځل وليدل چې د احرامونو د نندارې پر وخت يې د اس سپرلۍ کوله .

د برتانيا په يوې تر ټولو ډيرې چاپېدونکې ورځپاڼې ( سن ) کې د دې خبر سرټکى په دې ډول و (( د چيشير ميرمنې له بن لادن سره وادۀ وکړ . ))

ورځپاڼه وايي جېن فيليکس براون د کباړي توکو له سوداگر سره د روان ميلادي کال د اپريل په مياشت کې وادۀ کړى دى چې د اسامه بن لادن زوى دى . دى تر خپلې نوې ميرمنې ٢٥ کاله کشر دى .

د اسامه زوى واردمخه يوه بله ميرمن هم درلوده او د يوۀ ماشوم پلار دى . خو ميرمن براون هم پخوا پنځه ودونه کړي او پراېښي دي .

ميرمن براون وايي د اسامه بن لادن له زوى سره تر وادۀ وروسته دې يوازې يو ځل هغه ليدلى دى .

خو بيلتون پرې ځکه اغيز نه دى کړى چې د دې په وينا د دواړو طبعيت سره جوړ دى او د ورځې ١٥ ساعته په ټيلې فون يا اينټرنيټ خبرې سره کوي .

ميرمن براون وايي تر وادۀ وروسته اوس د خپل خاوند تخلص ځکه نه کاروي چې په هوايي ډگرونو کې د امنيتي پلټنو پر وخت ورته ستونزې پيدا کيږي .

د خپل خاوند عمر بن لادن په باب دغه برتانوۍ ميرمن وايي (( د هغه زړۀ پاک دى دي مذهبي او على کس دى . )

) داسې گومان دى چې عمر بن لادن د اسامه بن لادن د لومړنۍ ميرمنې زوى دى او ښايي د القاعده د مشر له شاوخوا ٢٤ اولادونو څخه يو وي .

ميرمن براون دا مني چې په لندن کې د چاودنو د وروستيو هڅو په ترڅ کې ښايي د دې د وادۀ دغه کيسه ځينې خلک وځوروي ځکه چې ډير خلک په دې باور دي چې دغه کار د القاعدې و .

دې د ټايمز ورځپاڼې ته وويل په هيله ده چې خلک به د دې په برخه کې بد قضاوت نه کوي ځکه چې دې د اسامه بن لادن له زوى سره نۀ له هغۀ سره واده کړى دى .