احمدي نژاد په عراق او افغانستان کې ميشت بهرني ځواکونه نيواکگر بللي

د بهرنيو چارو د وزارت وياند سلطان احمد بهين په دې اړه بي بي سي ته په خپلو څرگندونو کې په خپل هيواد کې د بهرنيو ځواکونوشتون د ايران په گډون د ټولې سيمې د ثبات لپاره اړين گڼلي . وياند د سيمې په هيوادو هم غږ کړى چې د ترهگرۍ خلاف جگړه کې له افغانستان سره مرسته وکړي .

د ايران د ولسمشر محمود احمدي نژاد د يکشنبې د ورځې څرگندونو افغان چارواکي له احتياط نه ډک خو په عين حا ل کې له دې پيغام سره ملۀ غبرگون ته اړويستل چې گواکې په افغانستان کې ميشت بهرني ځواکونه نه يوازې د دې هيواد بلکه د ټولې سيمي د ثبات په گټه دي .

کله چې په افغانستان کې سوله راشي نو بيا د بهرنيو ځواکونو د پاتې کيدو اړتيا پخپله له مينځه ځي د بهرنيو چارو د وزارت وياند سلطان احمد بهين

د ايران ولسمشر د بسيجيانو په نامه مليشو ته په خپله وينا کې په عراق او افغانستان کې ميشت بهرني ځواکونه نيواک گر بللي ول او وړانديز يې دا وو چې د دغو ځواکونو په ويستو کې دې د دواړو هيوادونو له خلکو سره مرسته وشي .

په افغان حکومت کې د بهرنيو چارو د وزارت وياند سلطان احمد بهين د ښاغلي احمدي نژاد د دغو څرگندونو په غبرگون کې په تهران غږ وکړ چې د افغانستان ځانگړي موقعيت او حساس شرايط دې له پامه نه باسي .

د ښاغلي بهين ټينگار دا وو چې افغانستان ته بهرني ځواکونه د ملگرو ملتونو د امنيت د شورا د پريکړو له مخې راغلي نو ځکه خو دده په وينا کله هم نيواک گر ځواکونه نشي بلل کيدى .

د بهرنيو چارو د وزارت وياند په دې هم ټينگار درلود چې د امن له اړخه خوندي او با ثباته افغانستان د ټولې سيمي په گټه دى . د ښاغلي بهين غوښتنه دا وه چې د سيمې هيوادونه دې له دې اړخه د انديښنو د ښودو پر ځاې له افغانستان سره د ترهگرۍ د ريښو په وچولو کې مرسته وکړي .

(( افغانستان د ترهگرۍ قرباني دى . بايد له افغانانو سره د ترهگرۍ په له مينځه وړو کې مرسته وشي . يوازې له همدې لارې دې هيواد ته سوله او ثبات راستنيدى شي . او کله چې سوله راشي نو بيا دلته د بهرنيو ځواکونو د پاتې کيدو اړتيا پخپله له مينځه ځي . له دې پرته افغانستان دغو ځواکونو ته اړتيا لري . ))

	بهين: افغانستان ته بهرني ځواکونه د ملگرو ملتونو د امنيت د شورا د پريکړو له مخې راغلي

(( موږ تل دا ويلي او غواړم يو ځل بيا ټينگار وکړم چې د افغانستان خاوره به کله هم د کوم گاونډي خلاف ونه کاريږي . دا زموږ د حکومت تگلاره ده او په دې کې بدلون نه راځي . ))

افغان حکومت تل په ټينگار سره ترهگري نړيواله ستونزه بللې او دهغې د مقابلې لپاره يې هم په بيا بيا د نړيوالې همکارۍ د پراختيا وړانديزونه کړي .

ښاغلي بهين د کابل د همدې دريځ په رڼا کې د بهرنيو ځواکونو پر مټ د طالبانو د ماتيدو يادونه وکړه ، هغه څه چې دده په وينا په سيمه کې تر بل هر چا وړاندې د تهران په گټه تمام شول . له دې سره جوخت دغه وياند تهران ته د دې وريادولو هڅه هم وکړه چې که طالبان راستانه شي نو تر بل هر چا وړاندې به گواکې ايران ته سرخوږاوى جوړ کړي .