ارش پاکطين له کابله

	ولسمشر کرزي له نړيوالې ټولنې وغوښتل چې له افغان پوځ سره دې مرستې وکړي ځکه له دې پرته د ده په وينا د ناټو او افغان پوځ ترمنځ د همغږۍ راوستل ستونزمن کار دى

ولسمشر کرزي په کندهار کې د ملکي کسانو پر وژنې خواشيني وښوده او ويې ويل چې د دا ډول پيښو د مخنيوي په موخه به له نړيوالو ټولنې سره د پاليسۍ او عمل په مجلس کې خبرې اترې وکړي.

(( دا غوښتنه مو مخکې هم کړې،بيا يې هم تکراره وو او د دوشنبې په ورځ مو د پاليسۍ او عمل مجلس دى . په هغه کې د افغان حکومت او ټوله نړيواله ټولنه ده او دا خبره به مطرح کړو چې هماهنگي څنگه ډيره کړو ؟ پنځه کاله د افغانستان د آزادۍ نه تير شول خو اوس هم د ملکي کسانو تلفات جريان لري. هم د خارجي تلفاتو بار زموږ په اوږو دروند شوى او هم زموږ دخلکو تلفات او شهادت د افغانستان په اوږو درند شوى چې دا ورځ په ورځ درنيږي.))

که څه هم افغان ولسمشر په ځانگړي توگه د کوم هيواد نوم وانه خيست خو يوځل بيا يې ټينگار وکړ چې د ترهگرو اصلي ريښې او روزنيز مرکزونه په افغانستان کې نشته او له نړيوالې ټولنې يې وغوښتل چې ددغې پديدې د له منځه وړلو لپاره دې ددوى اصلي ځالې له هيواده بهر په نښه کړي.

ښاغلي کرزي وويل ترهگر د خلکو له کورونو او جوماتونو ناوړه گټه اخلي نو ځکه د پوځي عملياتو پرمهال عامو وگړو ته مرگ ژوبله اوړي.

هغه همدارنگه له نړيوالې ټولنې وغوښتل چې له افغان پوځ سره دې مرستې وکړي ځکه له دې پرته د ده په وينا د ناټو او افغان پوځ ترمنځ د همغږۍ راوستل ستونزمن کار دى.

(( هلته چې افغانستان توان لري هلته تلفات لږ دي، هلته هماهنگي بهتره ده،هلته مو خبره او نظر هم اوريدل کيږي خو د هوايي قواوو له لحاظه افغانستان هيڅ هم نه لري. څه چې مو درلودل په تنظيمي جنگو کې،د طالبانو په شپو کې او تر هغه وړاندې ټوک ټوک شول. تر هغه چې افغانستان د خپل هوايي ځواک خاوند نه شي ،خپلې الوتکې و نه لري ،خپل امکانات ونه لري پوره هماهنگي او پوره نظم راوستل به مشکله خبره وي.))

له دې وړاندې هم له نړيوالې ټولنې غوښتل شوي و چې د پوځي عملياتو په ترڅ کې له احتياطه کار واخلي خو د ښاغلي کرزي په وينا دغو خبرو دومره مثبتې پايلې نه دي لرلي.

نژدې دوه ورځې وړاندې د کندهار په پنجوايي ولسوالۍ کې د ناټو د هوايي بمباريو په ترڅ کې لسگونه عام وگړي ووژل شول او يو شمير نور ټپيان شول .