راب واټسن

	د امنيت په پراختيا سره ناټو د فرصت يوه کړکۍ پرانستلې ده

ناټو وايې د افغانستان د پرمختگ لپاره کار کوي . دوى باور لري چې په ټکټيکي توگه يې طالبانو ته په دې ورستيو جگړو کې ماتې ورکړې ده .

خو دا هم وايې چې هيواد اوس په ډيرو حساسو او فيصله کونکو پړاونو کې دى او دلته ډير لږ وخت شته چې ملکي افغانان په دې قانع شي چې د طالبانو د وخت په پرتله يې اوس په ژوند کې بدلون راغلى دى .

ددغې خبرې په شاليد کې د ناټو سکرتر جنرال يپ ډي هوپ شيفر اوس پر نړيوالې ټولنې غږ وکړ چې ژر تر ژره دې د افغانستان د اقتصادي او سياسي بيا رغاونې لپاره پانگونه وکړي .

په لندن کې د خبرو پر مهال نوموړي وويل چې د امنيت په پراختيا سره ناټو د فرصت يوه کړکۍ پرانستلې ده .اوس د ملگرو ملتونو ، اروپايې ټولنې ، نړيوال بانک او نورو اړوندو نادولتي ټولنو د دندې د ترسره کولو وخت رارسيدلى دى چې خپل فعاليتونه پيل کړي .

په حقيقت کې ښاغلي شيفر په ډيپلوماټيک ډول څه نا څه ماته په خپل وړانديز کې روښانه کړه . خو په شخصي ډول په افغانستان کې د ناټو د پوځي افسرانو ترمنځ داسې احساس پروت دى چې ملگري ملتونه د ناټو د پوځي هڅو سره سم چمتوالى نه لري او پوځي هڅې به شنډې او له منځه لاړې شي.

که خلک پخپل ژوند کې پرمختگ ونه گوري ، لکه ددندو ترلاسه کول ، د سړکونو بيارغاونه او له فساد څخه پاکې حکومتي ادارې .