جنرال سورا يود کولانانت د تاىلنډ د پوځ وتلى او تکړه پخوانى جنرال گڼل کيږي

له دې کبله نوموړي پر داسې منډو ترړو لاس پورې کړ چې له مخې يې ژر تر ژره واک ملکي حکومت ته سپارل کيږي . خو په پاى کې ده داسې څوک ددې څوکۍ لپاره غوره کړ چې نژدې سړى يې بلل کيږي .

دا جنرال سورا يود کولانانت دى چې د تاى لنډ د پوځ وتلى او تکړه پخوانى جنرال گڼل کيږي . هغه مهال چې دې سړي په پوځ کې دنده تر سره کوله ، د اردو ترمنځ يې د درغليو د له منځه وړلو لپاره مبارزه وکړه او د يو ريکارډ په توگه دې کار د نوموړي له نوم سره مرسته وکړه .

د حيرانتيا خبره بيا داده چې نوموړى په پوځ کې د سياست د ورگډيدو ډير مخالف وو . هغه مهال چې پخواني لومړي وزير تاکسين شيناواترا د لومړي ځل لپاره په کال ٢٠٠١ کې واگې تر لاسه کولې ، دى د پوځ بولندوى وو .

دغه جنرال په هغه وخت کې هم دښاغلي تاکسين له ځينې کارونو سره مخالف وو .دى د تاىلنډ د پاچا نژدې سلا کار دى او ښايې دې کار مرسته کړي وي چې د لنډ مهالي لومړي وزير په توگه وگمارل شي .

خو له دې سره سره به نوموړى د بهرنيو گوتنيونکو د قانع کولو لپاره چې له پوځي لارې واک ته رسيدلى دى له ډيرو ستونزو او ننگونو سره مخامخ وي چې د امريکا متحد ايالات هم په کې راځي .

امريکا وار له مخه له تايلنډ سره پوځي مرستې ځنډولې دې . د نوي لنډ مهالي اساسي قانون له مخې پوځي جرگه ددې واک لري چې منځمهالى لومړى وزير له کاره گوښه کړي خو دا جرگه به يوځل لپاره ددغسې يو گام د اوچتولو وړتيا ولري .

جنرال سورا يود به اوس ښيي چې نوموړى د هغه خپل سړى دى او دى کولى شى چې تاىلنډ ژر تر ژره ملکي واک ته بوځي . پوځي جرگې هم ژمنه کړې ده چې د يوه کال په اوږدو کې به دا کار تر سره کيږي .