ترکيه دپوځي او طبي تجهيزاتو تر څنگه د سرتيرو او افسرانو په روزنه کې هم مرسته کوي

ښاغلي گونول په کابل کې خبريالانو ته د څرگندونو په مهال د ترکيې له لورې د ميدان وردگو په ولايت کې د ولايتي بيا رغوونې يا PRT د ټيم جوړولو ته د چتو والي د نيولو خبر هم ورکړيدى .

ښاغلي گونول افغانستان ته د خپل دريم سفر په ترڅ کې يو ځل بيا د خپل هيواد له لورې د افغانستان د دفاع له وزارت سره د مرستو د دوام پر ژمنې ټينگار وکړ . وجدي گونول وويل وزارت يې دې ته ژمن دى چې د افغان ملي پوځ لپاره مسلکي سرتيري او افسران وروزي ، پوځي تجهيزات ورکړي او د پوځ له روغتيايي مرکزونو سره د اړتيا وړ طبي سامان الاتو مرسته وکړي .

د افغانستان د دفاع وزير عبدالرحيم وردگ هم د خپل سيال له لورې ورکړل شوي ډاډ ته په اشارې سره وويل

ترکيه په پام کې لري چې سږ کال په دغو برخو کې د افغانستان د دفاع له وزارت سره د يو مليون امريکايي ډالرو په ارزښت مرسته وکړي . عبدالرحيم وردک

تير کال هم د ترکيې هيواد د افغانستان د دفاع له وزارت سره په ورته ډگرونو کې د څلور ميليونه امريکايي ډالرو مرسته کړې وه .

ښاغلي گونول په کابل کې خبريالانو ته د څرگندونو په مهال د وردگو په ولايت کې د ترکيې په مټ
د PRT په نامه د ولايتي بيا رغوونې د ټيم جوړولو ته د چمتو والي خبر هم ورکړ . اوس مهال د ناتو په مشرۍ د نړيوالو مرستندويه امنيتي ځواکونو ISAF په چوکات کې په افغانستان کې د دغو ټيمونو شميره له ٢٠ اوښتې ده . د دغو ټيمونو مشري هم د پرمختللو لويديځو هيوادونو په غاړه ده او دا لومړى ځل دىچې ترکيه په دغه سيالۍ کې د ورگډيدو تکل لري .

دا ډول ترکيه له هماغه پيله د نړيوالو مرستندويه امنيتي ځواکونو ايساف په چوکاټ کې فعاله ونډه لري چې ده ځله يې د دغو ځواکونو قومانداني هم په غاړه اخيستې او په پام کې ده چې په نږدې
راتلونکي کې د دريم ځل لپاره په مرکزي زون کې دISAF د ځواکونو کومانده په غاړه واخلي .

ترکيه له لويه سره د افغانستان د پوځ لپاره د مسلکي افسرانو په روزنه کې اوږود تاريخ لري . په افغانستان د پخواني شوروي اتحاد له يرغله وړاندې د افغان پوځ وتلي ارکان حرب او مسلکي افسران تر ډيره هغوى ول چې په ترکيه کې به يې پوځي زده کړې کړې وې .