بلال سروري له کابله

	د کابل هوايي ډگر مسوولينو په تيرو څو مياشتو کې په لسگونو کيلوگرامه هيروين ونيول

څو ورځې وړاندې د نيلوفر په نامۀ يوه مېندواره ښځه هغه مهال د پوليسو له توقيف څخه وتښتيده چې روغتون ته د پوليسو په بدرگه درملنې ته ورغلې وه .

نيلوفر او د دې خور تيره مياشت په کابل هوايي ډگر کې هغه مهال ونيول شوې چې هند ته يې د ١٦ کيلوگرامه هيروينو د قاچاق هڅه کوله .

د کابل د هوايي ډگر د پوليسو مشر جنرال امين الله امرخيل د نيول شوې ميندوارې ښځې په تېښته کې افغان پوليس او لويه څارنوالي پړه بولي .

دافغانستان دکورنيو چارو د وزارت د مخدره توکو سره د مبارزې د څانگې مشر جنرال کمال سادات هم په دې باور دى چې ساتونکو ښځينه پوليسو د نيلوفر په تېښته کې لاس درلود .
جنرال امين الله امرخيل وايي دغې پيښې وښودله چې د مخدره توکو مافيايي کړۍ د خپلو کارکونکو په خلاصون کې څومره برلاسي دي.

د کابل د هوايي ډگر د سرحدي پوليسو مشر زياتوي :

'' څرنگه امکان لري چې دومره جدي مجرمه په يوازې سر له زندانه په تيښتې بريالۍ شي ؟ ''.

د ده په وينا مافيايي ډلې په ډيرې آسانۍ کولى شي خپل کسان وژغوري . ښاغلى امرخيل ټينگار کوي چې د دۀ په وينا دغه پيښه وار له مخې پلان شوې وه.

جنرال امرخيل خپله انديښنه څرگندوي چې که داسې کسان په دومره آسانۍ خوشې کيدى شي نو گرانه به وي چې د مخدره توکو د ليږد د پراخيدونکې لمنې مخنيوى وشي.

د کابل د امنيه قومندانۍ له جنايي پيښو سره د مبارزې مشر جنرال علي شاه پکتياوال بي بي سي ته وويل د دغې پېښې د پلټنې لپاره يو پلاوى ټاکل شوى دى .

افغان لوړ پوړي چارواکي په اداره کې له فساد څخه انکار نه کوي خو د مخدره توکو پر ضد په مبارزې بوخت مامورين دغه وروستۍ پېښه خورا خطرناکه گڼي او اندېښنه څرگندوي چې که د داسې پېښو مخنيوى ونه شي د قاچاق په وړاندې هلې ځلې بريالۍ کيداى نه شي .