حنان حبيبزى له مزارشريف نه

	په افغانستان کې له ٣٠٠ څخه زيات ښونځي سوځول شوي دي

تيره شپه د نجونو دغه ليسه د بلخ ولايت د پوهنې د ريس په وينا دڅلور تنو ناپيژندل شو وسله والو كسانو له خوا سوځول شوې ده .

په دې ليسه كې په سلگونو نجونې پر زده كړو بوختې دي ، دغه ليسه چې د مستوره مستي په نامه ياديږي ، د خلم ولسوالۍ په مركز كې پرته ده .

سيمه ييزو خلكو وويل ، كله چې دوى د ليسې په ودانۍ كې د اور لمبې وليدې نو سم لاسي يې د له منځه وړلو لپاره ودانګل خو ددوى په وينا ډير ناوخته شوى ؤ ، خو بيا هم دوى په دې بريالي شوي دي چې د اور لمبې مړې كړي .

چارواكو وويل چې يوې ناپيژندل شوې وسله والې ډلې د تيرې شپې په نيمايي كې ددغې ليسې پر ودانۍ بريد وكړ اوليسې ته يې اور ورته كړ چې په ترڅ كې يې وايي د ليسې ګرد اسناد سوځول شوي دي .

په تيرو دوه مياشتو كې دا شپږم ښونځى دى چې د بلخ په ولايت كې سوځول كيږي .

خلم ولسوالۍ د پوهنې يو چارواكي وويل چې ددوى پلټنې روانې دي چې د پيښې لاملين جوت كړي .

له بلې خوا د بلخ ولايت د پوهنې ريس مولوي عبدالعزيز وويل چې يو پلاوي ته يې دنده سپارلې ده چې د ښونځي د سوځولو مساله وڅيړي . ريس وويل چې ددې ليسې سوځول سياسي بڼه لري او زياته يې كړه چې د ښونځي د اسنادو سر بيره ګردې دروازې او كړكۍ يې سوځول شوي دي .

ده دا د افغانستان د پوهې د دښمنانو كار وباله او زياته يې كړه چې تر اوسه په دې تور څوك نيول شوي نه دي .

كومې ځانګړې ډلې هم ددې ښونځي د سوځولو پړه په غاړه نه ده اخيستې .
د ښونځيو سوځول او نور ورته بريدونه چې د ټيكاؤ په له منځه وړلو كې لاس كوي افغان امنيتي ځواكونه او نړيوال سوله ساتي سرتيريې د افغانستان په شمال كې له انديښنو سره مخامخ كړي دي .

تيره ورځ د هيواد په شمال كې د نړيوالو سوله ساتو ځواكونو مشر جنرال ماركوز كينپ وويل چې دغه ډول پيښې د نشيي توكو قاچاق كونكي او ډول ډول غله او داړه ماران تر سره كوي چې د مخنيوي لپاره يې د ملكي خلكو د مرستې غوښتنه وكړه .