حنان حبيبزى مزارشريف

	د ايساف قومندان وايي چې د طالبانو له خوا بريدونه زيات شوي خو وايي دغه ډول بريدونه به ددوى په هوډ كې بدلون رانه ولي

كه څه هم په افغانستان كې نړيوال سوله ساتې ځواكونه په دې اند دي چې ٩٠ په سلو كې ملكي وګړي دامنيت په راګرځولو كې ددوى تر شاه ولاړ دى خو دا خبره په ټينګار سره كوي چې افغانان بايد له پوليسو او نړيوالو سوله ساتو ځواكونو سره مرسته وكړي چې د اورپكو د بريدونو مخه ونيول شي .

د افغانستان په شمال او شمال ختيځو ولايتونو كې د نړيوالو سوله ساتو ځواكونو وياند ډګرمن ماركوز ويردر چې خبريالانو ته غږيده ،وويل چې د اورپكو وروستۍ هڅې به دوى شاتګ ته اړ نه كړي . ده زياته کړه

(( دا چې موږ به يو ګام شاته پاتې شو ، داسې نه ده . موږ خپل كار د پخوا په پرتله ګړندى روان ساتو .موږ د افغانستان د امنيتي ځواكونو سره په ګډه خپله دنده ترسره كوو .
او د اورپكو دغه هلې ځلې هيڅ كله زموږ په دريځ كې بدلون نشې راوستلى .يو شى چې پرې ټينګار كوو دا دى چې د رامنځته شوي خطر مخه به په هر ډول چې وي نيسو به يې . كه مخنيوى يې ونشي ، په دې مانا دى چې هغوى ګټلې ده .))

ښاغلي ويردر زياته كړه چې ٩٠ په سلو كې افغانان ددولت ملاتړ كوي او نړيوالو سوله ساتو ځواكونو ته هركلى وايي خو دده په وينا ١٠ په سلو كې خلك داسې كسان دي چې هڅه كوي د ټولنې حالت د تاوتريخوالي خواته ولاړ شي .

ده ټينګار وكړ چې له افغان پوځ او پوليسو سره به په ګډه د هغو كسانو مخه ونيسي چې دده په وينا د خلكو امنيت يې له ګواښ سره مخامخ كړى دى .

ده په كندوز كې د وړمې ورځې د ځانمرګي بريد په اړه وويل چې پلټنې يې رواني دي چې پيدا كړي چې دا بريد به د چا له خوا تر سره شوى وي.

خو زياته يې كړه چې دغه ډول بريدونه به ددوى په هوډ كې بدلون رانه ولي.