پرون انگلستان ايکوادور ته او پرتگال هالنډ ته يو صفر ماتې ورکړې او منځلوبو يا کواټرفاينلز کې يې له يوۀ بل سره د سيالۍ موقعې وموندله .

د نن دواړه لوبې د روانو اتلوليو د دويم پړاو هغه سيالۍ دي چې تر لوبې وړاندې يې ډيرې خبرې نه کيږي .

	فوټبال شننونکي وايي ايټاليايي لوبغاړي پياوړي ښکاري ښايي استراليا يې مخه ډب نه کړي

که څه هم ايټاليا د نړۍ يوه له تکړه لوبډلو څخه ده خو استراليا بيا ورسره داسې نه گڼل کيږي چې نندارچيان دې له خپلې څوکۍ په ولولو راپورته کړي .

ايټاليا که څه هم په لومړي پړاو کې د خپل گروپ گټونکې وه خو پرمختگ يې د ډيرو په گومان پښه نيولى و .

د ايټاليا دفاع چې په نړۍ کې تر ټولو کلکه بلل کيږي په لومړي پړاو کې ډيره د ټينگې ښکاره نه شوه .

استراليا هم په دفاع کې خونده نه لرله خو په بريد کې يې څو ځلي توان وښود چې گول کولى شي .

ظاهرآ ايټاليا پياوړې ، تجربه لرونکې او بريالۍ ښکاري خو استراليا داسې روزونکى لري چې په تيرو اتلوليو کې يې سويلي کوريا تر نيمه پايلوبو يا سيمې فاينلز رسولې وه .

که دا ځل هم دى کومه توره وکړي ډيره به حيرانونکې نه وي .

دسويس او اوکراين ترمنځ لوبه بيا د ډيرو په گومان په دويم پړاو کې تر سره کيدونکيو لوبو کې د داسې دوو لوبډلو سيالي ده چې د اتلوليو د گټلو هيله ترې نه کيږي .

سويس په لومړي پړاو کې د فرانسې په وړاندې ښه وځليد . په دغې لوبډلې کې داسې کوم لوبغاړى نه و چې کور په کور دې نوم ولري خو د يوې لوبډلې په توگه په خپلو کې ښه همکار او سره تړلي ښکاره شول .

	اوکراين تر اتلوليو وړاندې له ايټاليا سره دوستانه لوبه وکړه

اوکراين بيا له اسپانيا څلور صفر ماتې وخوړه خو له سعودي او تيونس څخه يې لوبې وگټلې .

د اوکراين دفاع کمزورې ښکاره شوه په بريد کې يې هم ټولې سترگې شفچينکو ته وې که هغه ونه ځليږي اوکراين زړۀ ماتى دى .

د سويس تکړه مدافعې سنډراس ټپي شوى که د هغه ځاى ډک کړاى شي ښايي اوکراينيان کور ته واستوي .

پرون انگلستان له جرمني او ارجنتاين څخه وروسته دريم هيواد شو چې منځلوبو يا کواټر فاينلز ته رسيږي .

	ډيويډ بيکهم لومړنى انگريز لوبغاړى شو چې په درو نړيوالو اتلوليو کې يې گولونه کړي دي

انگلستان ايکوادور ته يو صفر ماتې ورکړه خو لوبه يې بيا هم هغسې نه وه چې د انگلستان فوټبال مينه وال يې په هيله دي .

د انگلستان لوبډله د څلور يو څلور يو په جوړښت لوبيدله . دا ډول سيستم دفاع پياوړې کوي او په بريد کې هم گڼ کسيزه حمله هغه وخت ممکنه وي چې منځډگري لوبغاړي له يرغلگر سره مرسته وکړي .

انگلستان تر يوۀ ځايه همداسې وکړل خو لوبه يې داسې وه لکه پټ پټانى چې کوي . يوه شېبه يې ښه پاسونه سره کول او پر لوبې يې واک درلود او بل شېبه يې ساده تيروتنې کولې .

له همدغه ډول يوې تيروتنې څخه ايکوادور نژدې گول کړى و خو شارټ يې د انگلستان د گول پاسنۍ ستنه وخوځوله .

د انگلستان گول د لوبې په ٦٠ دقيقه کپتان ډيويډ بيکهم وکړ . د ډي له کرښې دباندې د فول يوه هڅه ډيويډ بيکهم د گول تر جاله ورسوله . دا په تيرو دريو اتلوليو کې په پرله پسې توگه د بيکهم له خوا د گول کولو بريالۍ هڅه ده چې د انگلستان په تاريخ کې بل لوبغاړي دغه وياړ نه دى لرلى .

انگلستان به په منځلوبو يا کواټرفاينلز کې له پرتگال سره د شنبې په ورځ لوبه کوي .

پرتگال بيا د دويم پړاو لوبه له هالنډ څخه وگټله . دغې لوبې د روسي لوبڅار يا ريفري د کارډونو له امله نړيوال ريکارډ ټينگ کړ . دغه لوبڅار ١٦ ژيړ او څلور سرۀ کارډونه د دواړو لوبډلو لوبغاړو ته ښکاره کړل چې نړيوال ريکارډ دى .

د پرتگال له خوا د لوبې جوړونکى ډيکو او د دفاع لوبغاړى کاستينا دوه زيړ کارډونه وليدل چې ورسره سور هم مل و . د هالنډ له لورې بيا خالد بولورز او ون برونکاسټ په همدغه برخليک اخته شول .

د پرتگال يوازينى گول د لوبې په ٢٣ دقيقه کې منيژ وکړ . هالنډ څو چانسونه لرل چې گول مساوي کړي خو له خپلو ښو موقعو يې گټه وانه خيسته .

پرتگال په لومړي پړاو کې د نورو گولونو هڅې هم وکړې خو لوبه هغه وخت په شړيدو شوه چې روسي لوبڅار د لومړي پړاو په وروستيو شېبو کې د پرتگال يو لوبغاړى په دوو ژيړو کارډونو له لوبې ويوست .

پرتگال له ١٩٩١ کال څخه راهيسته له هالنډ څخه ماتې نه ده خوړلې . دوى به په منځلوبو کې له انگلستان سره لوبه کوي چې د ٢٠٠٤ کال په اروپاييي اتلوليو کې يې هم د منځلوبه ورسره لرله .

هغه لوبه پرتگال په پيناتي هڅو تر هغه وروسته وگټله چې تر اضافي وخت وروسته هم دواړه لوبډلې دوه په دوه مساوي پاتې شوې .

برازيل له گانا سره

د پنځو اتلوليو اتل برازيل دا ځل هم داسې ښکاري چې څوک به يې مخه ونه نيسي . په لومړي پړاو کې برازيل خپلې درې سره لوبې وگټلې خو گانا چيک جمهوريت ته په ماتې ورکولو ډير نندارچيان گوته په غاښ کړل .

د گانا منځډگرى لوبغاړى هيسن د ژيړو کارډونو له امله په دې لوبه کې برخه نه شي اخيستلى د هغۀ نشتوالى به لوبه برازيل ته لا اسانه کړي ځکه چې هيسن د انگلستان د چلسي په لوبډله کې لوبه کوي او د گانا يو له تجربه لرونکو لوبغاړو څخه دى .

برازيل جاپان ته په څلور يو ماتې ورکولو وښول چې د گول کولو تنده يې بيا پيدا شوې . د لوبې جوړښت او اوبدنې ته يې په پام سره دا امکان ډير دى چې دا ځل هم برازيل د اتلوليو وروستيو پړاونو ته ورسيږي .

	د فرانسې ډيرې هيلې د ارسنل لوبډلې په کپتان ټيرې هانري پورې غوټه شوي دي ، هانري تر اوسه په روانو اتلوليو کې دوه گولونه کړي دي

اسپانيا له فرانسې سره

د ډيرو په گومان ښايي دغه لوبه د دويم پړاو تر ټولو په زړۀ پورې لوبه وي .

اسپانيا د نويو او ځوانو لوبغاړو په موندلو دا ځل داسې ښکاري چې تر نور هر کله پياوړې ده . ځينې يې ان د اتلولۍ امکان نه ردوي .

فرانسې که څه هم په لومړنيو دوو لوبو کې ښه لوبه ونه کړه خو داسې ښکاري چې ورو ورو يې لوبه مخ په سميدو ده .

د فرانسې هانري ، ويرا او زيدان که وکړاى شي چې ښه لوبه وکړي نو د اسپانيا لوبډله به هېښه کړي خو اسپانيوي لوبغاړي له ډاډ او باوره ډک ښکاري .