په دغو لوبو کې ښايي يوه هم دويم پړاو ته د رسيدو لپاره اوسنى دريځ بدل نه کړي خو په زړۀ پورې لوبه به د هالنډ او ارجنتاين ترمنځ وي چې د ډيرو په گومان دواړه د اتلوليو د گټلو توان لري .

په پرونيو لوبو کې د جرمني او انگلستان لپاره په دويم پړاو کې سيالان معلوم شول .

د اهميت له پلوه ښايي د نن په څلورو لوبو کې د ايران او انگولا لوبه په دې د پام وړ وي چې که انگولا په ډيرو گولونو لوبه وگټله او مکسيکو په بلې لوبې کې پرتگال ته ماتې ورنه کړاى شوه نو د مکسيکو پر ځاى به انگولا دويم پړاو ته ورسيږي .

	ايران له پرتگاله دوه صفر او له مکسيکو درې يو لوبه وبايلله

انگولا له مکسيکو سره ښه لوبيدلې وه که هغه ډول لوبه له ايراني لوبغاړو سره هم وکړي نو شک نشته چې د ايران مات شوي لوبغاړي به بيا هم له ماتې سره مخامخ کړي .

ايراني لوبغاړو په خپلو دوو لوبو کې له مکسيکو درې يو او له پرتگال څخه دوه صفر ماتې خوړلې او بايد يې مورال رالويدلى وي .

انگولا له پرتگال څخه په مټ کې يو صفر لوبه وبايلله او له مکسيکو سره هم که بخت ورسره مل واى ښايي بريالي شوي واى .

د ايراني لوبغاړو لپاره دغه لوبه بې له دې چې له مهال وېش سره سم خپله دنده ترسره کړي بله کومه مانا نه لري .

ايران د اسيا په څلورو هيوادونو کې تر ټولو شاته پاتې شو . د اسيا د لويې وچې نورو ټولو لوبډلو لږ تر لږه کومه لوبه مساوي يا وگټلى شوه خو ايراني لوبغاړي ناکامه پاتې شول .

د نن بله لوبه چې د انگولا د لوبې اغيز به پرې بې له شکه وي د مکسيکو او پرتگال ترمنځ ده .

پرتگال واردمخه دويم پړاو ته له دوو بريو وروسته رسيدلى دى خو مکسيکو لږ تر لږه مساوي لوبې ته اړ دى چې دويم پړاو کې ځاى ومومي .

پرتگال او مکسيکو د ډيرو په گومان مساوي لوبډلې دي د دواړو د لوبو طرز هم سره ورته دى . که چيرې د مساوي کيدو په هيله له سستۍ کار وانه خلي نو ښايي لوبه يې په زړۀ پورې وي .

د نن تر ټولو ښکلې لوبه د ډيرو په گومان د هالنډ او ارجنتاين ترمنځ کيدونکې ده .

دغه دواړه لوبډلې دا توان لري چې د ٢٠٠٦ کال نړيوالې اتلولۍ وگټي . د دواړو دفاع تر يرغل يو څه کمزورې ده خو مينه وال چې د گولونو تنده لري د ارجنتاين او هالنډ په څير بريد کوونکي بايد وگوري چې چانس نه ضايع کوي .

د ارجنتاين او هالنډ لوبه به د دغو دواړو لوبډلو توان نور هم ښکاره کړي او وبه کتل شي چې دوى د پياوړو لوبډلو په وړاندې څه کولى شي .

د نن يوه بله لوبه د سربيا او مانتينيگرو او عاج ساحل ترمنځ ده چې پايله يې هيڅ مانا نه لري . دغه دواړه لوبډلې ناهيلي خپل کور ته ستنيدونکې دي .

د پرونيو لوبو په پاى کې څرگنده شوه چې کوربه هيواد جرمني به په دويم پړاو کې له سويډن سره او انگلستان به له ايکوادور سره لوبه کوي .

	د انگلستان مايکل اووين خپل زنگون ټپي کړ ښايي له ټولو اتلوليو پاتې شي

د انگلستان او سويډن ترمنځ لوبه په دوه دوه گولونو مساوي پاى ته ورسيده . د انگلستان تکړه لوبغاړى مايکل اوين د لوبې په لومړنۍ دقيقه کې ټپي شو چې ښايي له ټولو اتلوليو اوس ووځي . سويډن که دغه لوبه بايللې هم واى دويم پړاو ته ځکه رسيدۀ چې په بلې لوبې کې پراگواى ټرينيډاډ او ټوبيگو ته ماتې ورکړه .

خو د دې په سر هم سويډن په ځانگړې توگه د لوبې په دويمه برخه کې ښه لوبه وکړه . انگلستان تر ډيره په لومړنۍ برخه کې برلاسى و .

د پرون په يوه بله لوبه کې کوربه هيواد جرمني ايکوادور ته درې صفر ماتې ورکړه خو د څو نورو گولونو توان يې هم درلود . ايکوادور چې په تيرو دوو لوبو کې گول نه و خوړلى په دفاع کې کمزورى ښکاره شو او جرمني چې په تيرو لوبو کې يې د دفاع کرښه کمزورې ښکاريده پرون په دغه برخه کې هم غښتلى و .

کروېشيا له استراليا سره
کروېشيا له برازيل څخه لوبه بايللې او له جاپان سره مساوي شوې ده که دغه لوبه وبايلي دويم پړاو ته د رسيدو هيله نه لري خو استراليا له برازيله بايللې او له جاپانه يې گټلې ده د دې لوبې په مساوي کيدو هم ښايي دويم پړاو ته لار ومومي .

	د برازيل رونالدينيو تر اوسه لوبه پوره کنټرول کړې ده

جاپان له برازيل سره
برازيل استراليا او کرويشيا ته په ماتې ورکولو دويم پړاو کې ځان ته ځاى موندلى . جاپان له يوې ماتې او يوې مساوي لوبې سره بې له بري په بل هر حالت کې کور ته ستنيدونکى دى خو برازيل ته ماتې ورکول هم اسانه خبره نه ده .

چيک جمهوريت له ايټاليا سره
چيک جمهوريت په حيرانونکې توگه له گانا څخه لوبه بايللې ده خو له متحدو ايالاتو سره يې په لوبه کې درې پواينټونه ترلاسه کړي دي . ايټاليا له متحدو ايالاتو سره لوبه مساوي کړې وه خو له گانا يې گټلې وه په دې ډول له دغه گروپ څخه څلور سره لوبډلې لا هم دويم پړاو ته د رسيدو هيله لرلى شي . د چيک جمهوريت او ايټاليا ترمنځ لوبه کې به چيک جمهوريت تر لا ډير فشار لاندې ځان احساسوي .

گانا له متحدو ايالاتو سره
گانا چيک جمهوريت ته په ماتې ورکولو دويم پړاو ته د رسيدو ښه چانس موندلى دى . متحد ايالات د چيک جمهوريت په پرتله کمزورې لوبډله لري که دغه لوبه گانا وگټله د ايټاليا او چيک جمهوريت له ډلې به يو له دويم پړاوه پاتې کيږي .