ارش پاکطين له کابله

	د يونسف د ادارې د يوې سروې له مخې اوس مهال په افغانستان کې هر کال ٥٠ زره ماشومان د نس ناستي ناروغۍ له امله خپل ژوند له لاسه ورکوي.

په راتلونکي اونۍ کې به د يونسف د ادارې په مرسته د افغانستان د عامې روغتيا وزارت له لوري په ټول افغانستان کې د نس ناستي د ناروغۍ د مخنيوي لپاره روغتيايي کمپاين پيل شي.

د دغه کمپاين موخه په کورنيو کې پاکي او روغتيا ساتنه ښودل شوې ده.

د يونسف د ادارې د يوې سروې له مخې اوس مهال په افغانستان کې هر کال ٥٠ زره ماشومان د نس ناستي ناروغۍ له امله خپل ژوند له لاسه ورکوي.

دغه کمپاين د شنبې له ورځې نه په پلازمينې کابل کې پيليږي چې وروسته به د افغانستان يو شمير لويو ښارونو ته هم وغځول شي.

د کمپاين اصلي پيغامونه د نس ناستي د مخنيوي په موخه تر پخلي وړاندې د لاسونو مينځل ، ماشوم ته د مور شيدې ورکول ، د نس ناستي پرمهال د ډيرو مايعاتو څښل او يو شمير نورې لارې چارې ښيي.

په افغانستان کې د مگرو ملتونو د دفتر يوه وياند حليم صديق په يوې خبري غونډې کې وويل د يونسف د ادارې شميرې ښيې چې هر کال په افغانستان کې ٥٠ زره ماشومان د نس ناستي د ناروغيو له امله خپل ژوند له لاس ورکوي.

(( د يونسف د ادارې شميره ښيې چې هر کال ٥٠ زره هغه ماشومان چې له پنځو کلونو څخه يې عمر ښکته دى د نس ناستې ناروغۍ له امله خپل ژوند له لاسه ورکوي.

د کمپاين لومړى پروگرام په کابل کې د ٨٥٠ زره کسانو لپاره دى.

د کمپاين هر برخه په هرې سيمې کې ٢٠ ورځې وخت لري. او په سلگونو روغتيايي کارکونکي به ورسره وي. او همدارنگه به د ځينو ښونکواو مذهبي مشرانو له لوري به روغتيايي پيامونه خلکو ته ورسول شي.))

د ملگرو ملتونو دغه وياند زياته کړه د دغه کمپاين په ترڅ کې به د افغانستان په يو شمير لويو ښارونو کې دوه ميليونه کسان له روغتيايي معلوماتو څخه برخمن شي.

په افغانستان کې د اوړي د موسم له رسيدو سره سم د نس ناستي ناروغۍ مخ په زياتيدو دى چې لامل يې د چارواکو په وينا د هوا گرميدل ،د ناپاکو اوبو څښل او په سيمه کې د ډير خلکو اوسيدل گڼل کيږي.

چارواکي وايي دغه کمپاين به په لومړيو کې په کابل کې پيل شي خو وروسته به ننگرهار،بلخ او غزني ولايتونو ته هم وغځول شي.