خپلواک ساپى له کابله

	د اطلاعاتو کلتور پر سرپرست وزير مخدوم رهين دغو نيوکو ته په ځواب کې دا مني چې دولت ستونزې لري

په دې وروستيو کې په ځينو لويديځو مطبوعاتو کې داسې تبصرې راغلي چې د افغانستان دولت گواکې کمزورې او د خلکو له ملاتړه بې برخې دى .

په افغانستان کې د عادي ولس او حکومتي چارواکو دواړو په مينځ کې انگيرنه دا ده چې گواکې لويديځو مطبوعاتو په دې وروستيو کې پر افغان حکومت نيوکې ډيرې کړي دي .

په دې کې د نيوزويک ، نيويارک ټايمز او واشنگټن پوست په څيرد معتبره امريکايې ورځپاڼو هغو شننو ته گوته نيول کيږي چې د حالاتو په راکابو کولو کې افغان حکومت پاتې بولي .

يا دا چې په ليکنه يې لويديځ گواکې په افغانستان کې د يوه داسې حکومت ملا ورتړلې چې د ولس په مينځ کې ملاتړ نه لري .

دا په داسې حال کې ده چې د ولسمشر کرزي حکومت د افغانستان په ټول تاريخ کې لومړنى ټاکل شوى حکومت دى .

د افغانستان د اطلاعاتو او کلتور سرپرست وزير سيد مخدوم رهين دغو نيوکو ته په ځواب کې دا مني چې دولت ستونزې لري ، خو تر څنگه يې د نوي افغانستان په جوړولو کې په تر لاسه شويو برياوو له څيرمې د کرښې راښکل له مسوليته ليرې څرگندونې بولي .

د لويديځو مطبوعاتو د نيوکو تر څنگه د کور دننه هم د ښاغلي کرزي په حکومت د کمزورتيا له اړخه وخت ناوخته سختې نيوکې کيږي .

(( زموږ ستونزې ډيرې دي او ولسمشر يا حکومت نه شي کولې چې ټولې دغه ستوزې په لنډه موده کې اوارې کړي . په خواشينۍ سره چې يو شمير لويديځ مطبوعات په دې اړه غيرې مسولانه ليکنې کوي . ددې په ځاې پکار دا ده چې دوى زموږ له خلکو سره مرسته وکړي . نه دا چې نا هيلي يې کړي .))

لويديځ مطبوعات په خپلو شننو کې د افغانستان په اړه د منفي انځور د وړاندې کولو تر شا بيلا بيل دليلونه مخې ته کوي .

د ميرمن برون وين په نامه کابل ميشتې لويديځ واله خبرياله چې يوه نړيوال خبري اژانس ته کار کوي ، د گڼو دغو دليلونو له مينځه په حکومتي ادارو کې د فساد او درغلۍ تر څنگه په پرله پسې توگه د نا امنيو د پيښو د ډيريدو يادونه کوي .

(( يوه لويه نيوکه د فساد له اړخه ده . د ځينو په باور ډير داسې کسان شته چې له کاره بايد گوښه کړل شوي واى . ځکه چې دوى په جنايتونو او د نيشۀ توکو په قاچاقو کې راښکيل دي . خو دوى برعکس په لوړو څوکيوگمارل شوي دي . موږ خبر يو چې د عادي افغانانو يوه لويه پوښتنه همدا ده چې حکومت ولې داسې کوي . دوهمه خبره د باغيانو له اړخه د ولس انديښنې دي . داسې ښکاري چې بغاوت گواکې پاى نه لري . خلک د دې حالت له دوامه د ستړيا او ډار احساس کوي . پړه يې هم پر حکومت او د حکومت پر نړيوالو ملاتړو اچوي . دوى پوښتي چې له شته امکاناتو سره سره ولې په څلورنيمو کلونو کې دغه ستونزه اواره نه شوه . ))

خو ښاغلى رهين بيا دا گڼي چې څلور – څلورنيم کاله ، د افغانستان په څير د دريو لسيزو له کړکيچ نه د راولاړ شوي هيواد دننه ، د يوه نوي نظام د رادبره کولو لپاره خورا لنډه او تنگه موده ده .

(( زما او ستا په عمر کې څلور کاله يوه اوږده موده ده . خو د يوه ملت په عمر کې څلور کاله هيڅ هم ندي . د دوو دقيقو حيثيت لري . او بيا خداى مکړه که دا حکومت نه وي ، نو وبه ليدل شي چې څه کيږي . موږ خو د دې ډيرې تجربې لرو . وړاندې تر دې چې په حکومت او ولسمشر غيرې مسولانه انتقاد وکړو ، پکار دا ده چې ځانونه په حالاتو سم پوه کړو . ))

د اطلاعاتو او کلتور سرپرست وزير د نا امنيو د پيښو د ډيريدو په پړه هم د حکومت گرم بلل له انصافه ليرې بولي .

باور يې دا دى چې د دغو پيښو تر شا گواکې له کينې دک بهرني لاسونه دي .

خو دا چې دا لاسونه د چا کيدى شي ، په اړه يې د زيات وضاحت له ورکولو او يا د کوم ځانگړي هيواد له نومولو ډډه کوي .

د لويديځو مطبوعاتو د نيوکو تر څنگه د کور دننه هم د ښاغلي کرزي په حکومت د کمزورتيا له اړخه وخت ناوخته سختې نيوکې کيږي .

د کمزورتيا لوى لامل يې د بيلابيلو اړيکو او سياسي جوړ جاړي پر بنسټ د لوړې کچې حکومتي چارواکو گمارل کيده ياديږي .

د ډيرو په باور دا داسې يو څه دي چې هم يې د حکومت د واکمنۍ اصل کمزورى کړى او هم يې ولسمشر کرزى د خپلو کړو ژمنو په پوره کولو کې پاتې راوستى دى .