محمود کوچى د ولسي جگې له تالاره

	ولسي جرگې ويل واشنگټن دې بايد پر اسلام اباد فشار ډير کړي چې د دوى په وينا ترهگر ونيسي .

ولسي جرگې دغه راز غوښتنه کړې چې متحد ايالات دې په اسلام اباد فشار ډير کړي چې د ترهگرو روزنيز مرکزونه وتړي .

ولسي جرگه په داسې وخت کې د افغانستان پر امنيت بحثونه کوي چې ځينې استازي يې اوبه له ورخه تيرې شوې بولي .

دا لومړى ځل دى چې د ولسي جرگې غړي د افغانستان د امنيت پر مسالې جدي خبرې کوي .

ځينو غړو گيله کوله چې د ولسي جرگې مشرتابۀ د امنيت په څير يوې مهمې مسالې ته تر اوسه دومره پام نه و کړى .

تر ټولو ډيره غوښتنه د يوې داسې جرگه گۍ د جوړلو وه چې د پاکستان له سياسي گوندونو او د هغۀ هيواد د پارلمان له غړو سره خبرې وکړاى شي .

ولسي استازو ويل چې دغه جرگه گۍ بايد په گاونډي هيواد کې د دوى په وينا د ترهگرو د روزنيزو کمپونو د تړلو په اړه خبرې وکړي .

دوى د متحدو ايالاتو رول هم مهم بالۀ او ويل يې چې بايد واشنگټن پر اسلام اباد فشار زيات کړي چې د دوى په وينا ترهگر ونيسي .

د ځينو استازو پر افغان دولت تينگار کاوۀ چې د نا امنو سيمو چارواکي بدل رابدل کړي .

د دوى په گومان ځينې ولايتي چارواکي په لوى لاس ولس د ترهگرو ځولۍ ته وراچوي .

د افغانستان په ځينو وزارتونو کې د نا امنو سيمو د استازو نشتوالى هم د ولسي جرگې استازو ياد کړ .

د ايتلافي ځواکونو او افغان پوليسو او پوځ له لورې د بې گناه خلکو نيول او وژل هم د ولسي استازو په گومان د نا امنيو يو دلىل دى . غوښتنه يې دا وه چې بايد په دې برخه کې دقت وشي .