طاهر خان له اسلام اباد څخه

	په دې وروستيو کې د پاکستان تر ولکې لاندې کشمير او د هند د کشمير ترمنځ هم د بسونو اړيکه ټينگه شوې ده .

له پېښور نه لومړى بس، چې شاوخوا ٢٢ مسافر پکې سپاره وو، پېښور سره نژدې د کارخانو بازار څخه د جمعې په ورځ ( د غبرگولي ٥ د مۍ ٢٦ ) جلال آباد ته وخوځيد.

د پېښور او جلال آباد ترمينځ بس سرويس په ١٩٧٩ کال کې هغه وخت وځنډول شو چې شوروي اتحاد په افغانستان يرغل وکړ.

اسلام آباد ته د ٢٠٠٥ کال د مارچ په مياشت کې د افغان ولسمشر حامد کرزي د سفر په ترڅ کې دواړو هيوادونو د بس سرويس د شروع کولو په اړه يوه موافقه کړې وه چې دواړو غاړو د روان کال په فبرورۍ کې يوه رسمي موافقه لاسليک کړه.

جلال آباد ته د بس د روانيدو په وخت د صوبه سرحد د ترانسپورټ وزير اختر نواز خان ، د افغانستان د قونصلګرۍ چارواکي او ګڼ شمير خلک موجود وو.

د پروګرام ترمخه به هره ورځ د پېښور او جلال آباد ترمينځ ١٠ بسونه تګ راتګ وکړي.
د موافقې ترمخه د بس مسافر بايد چې سفري اسناد ولري.

د يو اړخ کرايه ٣٠٠ کلدارې ( نژدې ٥ ډالره ) ټاکل شوې ده ولې د لومړي بس مسافرو لپاره په کرايه کې ٥٠ فيصده کمى شوى و.

د بس د افتتاح په وخت کارخانو بازار کې يوه دستوره هم جوړه شوې وه چې وينا کوونکو د بس شروع کيدل د دواړو ولسونو ترمينځ د تګ راتګ لپاره يو مهم ګام اوباله.

د پاکستان نه د بسونو چلولو د سازمان مشر ذکريا خان وويل چې د مسافرو او د بسونو لپاره کلک امنيتي ګامونه په پام کې نيول شوي دي.

دواړه حکومتونه به په خپله خاوره د مسافرو او بسونو د حفاظت مسووليت په غاړه لري.
پاکستان او افغانستان پلان لري چې د جلال آباد او پېښور له بس سرويس وروسته د کوټې او کندهار ترمينځ هم د بسونو تګ راتګ شروع کړي.