ارش پاکطين له کابله

	په لرغوني غزني کې له تيرو څو ورځو د وسله والو طالبانو له لورې غلچکي بريدونه کيدل

دوى دغه عمليات خورا لوى بولي . چارواکي زياتوي د غه عمليات يې تر هغه وروسته پيل کړل چې د دوى په وينا دغلته ترهگر فعاليتونه ډير شول .

په تيرو څو وختونو کې د وسله والو طالبانو له لورې د غزني ولايت په درو بيلا بيلو ولسواليو کې لږ تر لږه شپږ افغان پوليس وژل شوي او اووه تنه نور يې په غلچکيو بريدونو کې ټپيان شوي دي .

دغه راز يوۀ ځانمرگي بريد هم په دې وروستيو کې دغلته يو ملکي کس وژلى دى .

د غزني له مرکزه سويل ختيځ لور ته د واغز په ولسوالۍ کې د تيرې شپې د عملياتو پر وخت هم افغان پوليسو ځاني زيان ليدلى دى .

چارواکي د دوو پوليسو د وژنې او د نهو نورو د ټپي کيدو خبر ورکوي . د دولت له غاړې په ټپي شويو کسانو کې د غزني ولايت د پوليسو يو قومندان عبدالوکيل کامياب هم شامل دى .

په دغو عملياتو کې د غزني د چارواکو په وينا ١١ طالب وسله وال وژل شوي دي . د غزني ولايت د امنيې قومندان عبدالرحمن سرجنگ د طالبانو د يوۀ قومندان د نيولو يادونه هم کوي .

دى وايي دغه قومندان د ملا نعيم په نامۀ دى چې د دۀ په وينا خورا مهم کس دى . د غزني ولايت دغه نښتې په داسې وخت کې کيږي چې له کندهار او هلمند ولايتونو څخه د وسله والو طالبانو پر ضد د لويو عملياتو خبرونه راځي .

په کابل کې د ځينو شننونکو په وينا داسې ښکاري چې افغان ځواکونه او نړيوال ايتلاف په بيلا بيلو سيمو کې پر طالب وسله والو د کړۍ تنگولو هڅه کوي .