حنان حبيبزى له بلخ ولايت څخه

	دا دويم ځل دى چې په بدخشان کې ښوونځي سوځول کيږي

که څه هم په تير يوۀ کال کې د ښوونې و روزنې د وزارت په وينا تر ٩٠ ډير ښوونځي په افغانستان کې سوځول شوي دي .

په يو وخت كې د دوه ښونځيو سوځولو چارواكو ته ټكان وركړى دى . د چارواكو په وينا دغه دواړه ښونځي د ناڅرګندو وسله والو كسانو له خوا سوځول شوي دي .

د بلخ د چمتال په ولسوالۍ كې دا دويم ځل دى چې د نجونو يوۀ منځني ښونځي ته اور ورته كيږي . دغه ښونځى چې د عرب مزاري په نامه ياديږي او ٨ ټولګي يې لرل ، نژدې ٦٠٠ تنو نجونو په كې زده كړې كولې .

د بلخ ولايت د پوهني سرپرست ريس وويل چې د ښونځي د ادارې سربيره زياتره ټولګي او درسي توكي د اور په لمبو كې ايره شوي دي او دده په وينا د ښونځي ودانۍ ته يې ډير زيان اړولى دى .

د عرب مزاري د ښونځي د ودانۍ د رغاونې كار په دې وروستيو مياشتو كې بشپړ شوى و .

څلور مياشتې وړاندې هم ددغې ولسوالۍ مركز ته څيرمه د نجونو پر يو ښونځي د شپې له خوا بمي بريد شوي وو چې له كبله يې ودانۍ او ځينې درسي توكي سوځيدلي وو .خو د عرب مزاري ښونځي ته د چارواكو په وينا اور له هغې وروسته ورته شوى دى چې نا څرګندو وسله والو كسانو د ښونځي دوه تنه ساتندويان په پړي كلك وتړل .

ها خوا د بدخشان ولايت اداري ريس بي بي سي ته وويل چې ددغه ولايت د درايم نومي ولسوالۍ يو لومړنى ښونځى چې نجونو او هلكانو په ګده زده كړې په كې كولې سوځول شوى دى . له دې وړاندې هم په دغه ولايت كې يو بل ښونځي ته اور ورته شوى وو چې په ترڅ كې يې د چارواكو په وينا د ښونځي درسي توكي او ټولګي له منځه لاړل .

د بدخشان ولايت چارواکي ادعا کوي چې ځينې كسان د افغان دولت له مخالفينو څخه د پيسو د اخيستنې په بدل كې د ښونځيو پر سوځولو لاس پورې كوي .

خو د بلخ ولايت د پوهني سر پرست ريس ددغو ښونځيو د سوځولو پړه مخامخ پروسله والو طالبانو واچوله او ويې ويل چې تر اوسه يې په تور څوك نيول شوي نه دي .

د بلخ والي عطا محمد نور پوليسو ته سپارښتنه كړې چې په سيمه كې شكمن كسان ونيسي او پلټنې ترې وكړي .

تيره اونۍ د سرپل په ولايت كې پر يو وخت ددوه ښونځيو سوځولو وښوده چې په دې سيمو كې هم هغو ډلو چې د ښونيزو مركزونو پر سوځولو لاس پورې كوي خپل فعاليتونه پيل كړي دي .خو د تيرې شپې پيښو دا ويره زياته كړې ده چې دغه نا څرګند كسان د افغانستان په شمال او شمال ختيځو ولايتونو كې خپل فعاليتونه ګړندي كوي .

يو ځايي ښونكي بي بي سي ته وويل ،كه په دې ولايتونو كې چارواكي د ښونځيو د سوځوني د بهير په مخنيوي كې پاتې راشي د هغو ماشومانو شميره ښايي زياته شي چې دولسمشر كرزي په وينا د ترهګرو فعاليتونو له كبله له زده كړو پاتې دي .