افغان چارواکي وايي د طالبانو له نسکوريدو راهيسته د ودانۍ جوړولو په برخه کې تر ټولو ډيره پانگونه شوې ده .

تير کال د (( سرينا )) په نامۀ يو پنځه ستورى هوټل د څه کم ٤٠ ميليونه ډالرو په لگښت د يوۀ بهرني پانگوال له لورې جوړ شو .

د حاجي نعيم حبيبي په نامۀ افغان سوداگر د کابل ښار په زړۀ کې د نوي هوټل پر جوړولو تر هغه وروسته لاس پورې کړ چې قانوني جوازونه يې وموندل .

دغه نوى هوټل به د انټرکانتينينتل دريځ لري . د يوۀ افغان چارواکي په وينا د کابل پخواني انټرکانتينينتل هوټل په ١٩٩٢ کال کې د کابل پر ښار د تنظيمي جگړو له پيله وروسته دغه ځانگړى دريځ له لاسه ورکړى دى .

افغان دولت د نوي هوټل پر جوړيدو خوښي کوي او په دې باور دى چې په دغه ډول کارونو به لا ډير بهرني او کورني شتمن په افغانستان کې پانگونې ته زړۀ ښه کړي .

د طالبانو له نسکوريدو راهيسته په افغانستان کې د چارواکو په وينا تر ٣ ميليارده ډالرو ډيره پانگونه شوې ده .

په افغانستان کې د پانگونې د ملاتړ يا ايسا د ادارې مشر ډاکټر عمر زاخيلوال د بي بي سي (( ستاسو غږ )) خپرونې ته وويل تر ټولو ډيره پانگونه د ودانۍ جوړولو په برخې کې شوې ده .

په دويمه کچه د مخابراتو ، ورپسې د خدماتو او په څلورمه درجه کې صنعت دى .

ښاغلي زاخيلوال وويل هالنډي پانگوال د زراعت په ډگر کې پانگونې ته زړۀ ښه کوي او همدا اوس له افغان دولت سره په دې برخه کې په خبرو بوخت دي .

د افغانستان د پانگونې د ملاتړد ادارې مشر د تيلو او غازو د زيرمو په باب د يوې پوښتنې په ځواب کې وويل چې په دغه هيواد کې نويو پلټنو موندلې چې د پام وړ زيرمې شته دي .