آرش پاکطين له کابله

	ښاغلي جنبش وويل زه د دغو دوو کسانو د مرگ لامل نه يم

د کابل د پوليسو مشر جنرال جميل جنبش د بشري حقونو د څار ټولنې وروستۍ څرگندونې په لوى لاس سره جوړې شوې هڅې وبللې چې گواکې د دۀ پر ضد روانې دي .

د بشري حقونو د څار ټولنې په ريپوټ کې چې تيره اونۍ خپور شو د کابل د امنيې قومندان جنرال جميل جنبش هغه کس بللى شوى و چې گواکې د دوو کسانو په وژنو کې ښکېل دى .

تير کال د سيد حسين او کچکول په نامۀ دوه کسان د کابل پوليسو په توقيف کې مړۀ وموندل شول . په دوى کې لومړنى پر دوو نجونو د جنسي تيري په تور او دويم د برمته کولو په تور نيول شوى و .

ښاغلي جنبش نن ( پنجشنبې د غويي ٢١ د مۍ ١١ ) په کابل کې د يوې خبري غونډې په ترڅ کې دغه تورونه په کلکه رد کړل او ويې ويل د عدلي طب د څيړنو پايلې د بشري حقونو رپوټ ناسم ثابتوي .

ښاغلي جنبش وويل زه د دغو دوو کسانو د مرگ لامل نه يم:

(( پريږدى چې دا حکم قضايي سرچينې وکړي. ښکيلو ادارو بايد خپلې څيړنې بشپړې کړې واى او وروسته يې بيا دا خبر خپور کړى واى . دا کار زما په نظر سم نه دى. او په دې برخه کې بايد له موږ سره په مستقيمه توگه خبرې شوې واى چې داسې نه دي شوي.))

تر اوسه د افغانستان قضايي سر چينو د پوليسو په توقيف کې د وژل شويو دغو دوو کسانو په باب څه نه دې ويلي .

د افغانستان د ولسمشرۍ د رياست مشر جاويد لودين د بشري حقونو د څار ټولنې له خپاره شوي ريپوټه دوه ورځې وروسته ، ياد شوي تورونه ناسم وبلل.

د کابل د پوليسو مشر وايي له سياسي او پوځي پلوه د چا ملاتړ نه احساسوي او ښايي همدا دليل وي چې په نړيواله کچه د دۀ په وينا د قتل په پېښو کې ښکېل بلل کيږي .