ولسي جرگه د مامورينو د معاشونو په برخه کې سره وېشلې ده

سره له دې چې د ولسي جرگې استازي د دغې لانجمنې موضوع په سرد دوو اونيو را په دې خوا غونډې کوي خو تر اوسه کومې پايلې ته سره نه دي رسيدلي په پام کې وه چې د پنجشنبې د ورځې په غونډه کې دغې لانجې ته د پاى ټکى کيښودل شي خو اوس داسې ښکاري چې د جرگې غړي د همدغې موضوع په سر په دوو ډلو سره ويشل شوي دي ځيني وايي تر اوسه په دغې بودجې زيات کار شوى او د دولتي کارکونکو په مياشتنيو تنخواگانو کې زياتوالى شونى نه بريښي .

که په جوړه شوې بودجه کې گوتې ووهل شي نو د سمون پر ځاى به موضوع نوره هم د کړکيچ په لورې لاړه شي ببرک شنوارى

خو بلې غاړې ته استازي وايي په هر ډول چې کيږي په سږنۍ بودجه کې دې د دولت د کارکونکو په مياشتينيو معاشونو کې بدلون را شي ، د ارزگان ولايت استازې سونا نيلوفر يوه له همدغو لستازيو څخه ده :

( ( زموږ ځينې خلک دا تمه لري چې د هغوى په مياشتنيو امتيازاتو کې بدلون راشي که داسې وه نه شي نو خلک بيا پر موږ باور هم نه کوي او په ٢٥٠٠ افغانيو په يوې مياشت کې د يو ماشوم خرڅ هم نه پوره کيږي ، نو موږ غواړو چې دغه امتيازات لږ تر لږه ٥٠٠٠ افغانيو ته لوړ شي .))

بل لور ته د ولسي جرگې د تيرو ورځو په غونډو کې د افغانستان د ماليې وزير ويلي وه چې اوس مهال په معاشونو کې د زياتونې په سر ورسره مرستندويه هيوادونه نه دي سلا شوي او په عادي بودجه کې هم دومره شونتياوې نه شته چې په سږنۍ بودجه کې د دولت د کارکونکو په معاشونو کې زياتوالى راولي .

د ننگرهار ولايت استازى ببرک شينوارى وايي که په جوړه شوې بودجه کې گوتې ووهل شي نو دسمون پر ځاى به موضوع نوره هم د کړکيچ په لورې لاړه شي :

(( زما له نظره بايد دغه بودجه چې ډير کار پرې شوى د ډيرې لاسوهنې ځپنې خوندي پاتې شي او که په بې مسوليته توگه په کې لاس وهل کيږي نو د گټې پر ځاى به يې تاوان ډير وي ، کيداى شي چې په راتلونکو کلونو کې په بودجه ډير کار وشي او بيا پاس شي .))

د دولت يو شمير کارکونکي ويره لري چې د معاشونو په زياتولو سره به په ښارونو کې بيې نورې هم اوچتي شي ، د هغوى له نظره که چيرته دولتي چارواکي د خوارکي توکو په ويشلو لاس پورې کړي او د پخوا په څير کوپونونه په هغوى وويشل شي هم به يې اقتصادي ستونزې تر يوه بريده هوارې شي او هم به په بازارونو کې بيې کنټرول شي .