ميرويس افغان له کندهاره

	دغه پوله ډير کله پاکستاني پوله ساتي تړي

د كورنيو چارو وزارت وياند محمد يوسف ستانكزى وايي چې د كندهار سپين بولدك ولسوالۍ ته د سرحدي پوليسو عمومي رئيس جنرال هارون آصفي سفر درلود، د ده په خبره د دغه سفر موخه د سپين بولدك له پولې څخه ليدنه او د سرحدي پوليسو تكړه كول و.

د افغان چارواكو له لوري د سپين بولدك د پولې پر بندېدو باندې سيمه ييزو خلكو او ځايي تجارانو سخت غبرګون ښوولى دى، دوى وايي چې د پولې د بندېدو له كبله يې سوداګرۍ ته ډير زيانونه وراوښتي دي.

دغه پوله څو_څو ځله د پاكستان چارواكو له لورې تړل شوې وه، پر دغه پوله هره ورځ په لسګونو زره افغانان تګ_راتګ كوي او د دغه هيواد د سويل لوېديځو ولايتونو ډېرى وګړي د كوچنيو تجارتونو تر څنګ په پراخه پيمانه ناروغان هم د درملنې لپاره ګاونډي هيواد پاكستان ته بيايي.

د سپين بولدك د پولې ارزښت په دې كې بلل كېږي چې د همدغه سرحد له لارې منځنۍ آسيا د نړۍ له نورو هيوادونو سره تړل كېږي او ګڼ تجاران د نړۍ له بېلابېلو هيوادونو څخه د سمندر له لارې پر همدغه سرحد باندې منځنۍ آسيا ته تجارت كوي.
ځينې افغان چارواکي تور لگوي چې له پاكستان څخه طالب اورپکې افغانستان ته وراوړي .

د پولې تړل شايد ځينې د طالب اورپکو له ممکنه بريدونو سره وتړي .