د هند په ممبۍ کې د فېشن نندارې ډيرو جامو خلک هېښ کړل

ستونزه يوازې دا نه وه چې دغه جامې تر ډيره بربنډې وې بلکې کومو ستورو چې اغوستې وې هغوى هم ورسره روږدې نه وې .

په يوه پېښه کې د يوې ماډلې يا ستورې ټټر هغه وخت په بشپړه توگه لوڅ شو چې پر سر پروت ټوکر يې وشکيدۀ .

په يوې بلې پېښې کې د يوې بلې ماډلې د کميس شاتنى زنځير پرې شو ، ملا يې هسې هم لوڅه وه لاندې هم پسې لوڅه شوه .

په دې پېښه قهر و غصه دومره زياته شوه چې ايالتي جرگې پرې بحث وکړ او د تحقيق غوښتنه يې وکړه .

د مهاشترا ايالت د پوليسو مشر ار ار پټيل وويل دوى پلټنې وکړې او ورته جوته شوه چې دغه دواړه پېښې اتفاقي وشوې چا په لوى لاس داسې څه په خيال کې نه و .

د مهاشترا ايالتي جرگې يوۀ غړي بي بي سي ته وويل (( دغه فېشن شو يا ننداره هسې هم پر ځاى نه ده ، کومې جامې چې ستورو اغوستې وې هغه تر نيمايي ډيري بربنډې وي . زۀ غواړم چې د هند د ښځو ټولنې سره ټولې شي او اعتراض وکړي . ))

نورو هم په خپل اعتراض کې ويلي چې دا له هندي کلتوره ليرې خبره ده .

	تر هغه وروسته چې زنځير وشکيدۀ دغې ستورې هڅه وکړه چې ځان پټ کړي .

د دې په گومان بايد له جامو سره دغه ستورې روږدې شوې واى .

په فېشن شو يا نندارو کې د جامو نوي ډيزاينونه وړاندې کيږي چې په لويديځه نړۍ کې خورا ډير مينه وال لري .

البته په لويديځ کې هم د هند په څير ستونزې کله نا کله ليدل کيږي .

په ٢٠٠٤ کال کې د امريکا سندرغاړې جېنت جکسن هغه وخت گنگوسو او شور ته خبره راکاږله چې د يوې نندارې پر وخت يې ټټر لوڅ شو .

د هنر او ادب نور خبرونه د دې ځاى په کېکاږلو ترلاسه کړئ