په کابل کې د څرخي پله په زندان کې د افغانستان دبيلابيلو حکومتونو په وخت کې ډير بنديان ساتل کيدل

نوموړى د تيرې جمعۍ په ورځ د هالند او جرمني ترمنځ پوله کې هغه مهال ونيو ل شو چې هڅه ېې کوله له پولې واوړي او برلين ته سفر وکړي .

د هالند دڅارنوالانو له قوله ويل شوي چې په روتر دام کې د هغه د کور تالاشي هم شويده .

ښاغلى فقير زاده ، په ١٩٨٠ کلونو کې په افغانستان کې د کمونيست پلوه حکومت د واکمنۍ پر مهال د پوځي استخباراتو د ادارې دمشر مرستيال وو .

ادعا شوې چې په دغو کلونو کې په لسگونو زره کسان د وخت د واکمنۍ سره د مخالت له کبله زورول شوي ، بنديان شوي او وژل شويدي .

تير کال د اکټوبر په مياشت کې د پوځي استخباراتو دوه پخواني مشر چارواکي ، جنرال حسام الدين حسام د پوځي استخباراتو د ادارې مشر ، او حبيبالله جلال زوى ، ددغې ادارې يو لوړ رتبه مامور ، د جنگي جرمونو له کبله په هالند کې يوې محکمې په ١٢ او ٩ کلونو بند محکوم کړل . خو تورنو کسانو ځانونه بې گناه وبلل او لوړه محکمو ته ېي اپيل وکړ .

همداراز د افغانستان د استخباراتو يو بل پخوانى مشر ، اسدا لله سروري ، لنډه موده مخکې په کابل کې تر محاکمې لاندې ونېول شو. د غه محاکمه هم دوام لري

که د پوځي استخباراتو پر نوي نيول شوي چارواکې عبدالله فقير زاده باندې د جنگي جرمونو د ادعاوو تورونه ثابت شي ، د بند له سزا سره مخامخ کېداى شي .

د هالند د قوانينو له مخې ددغه هيواد محکمې حق لري هغه کسان محاکمه کړي چې بهر کې پر بشري ضد جرمونو باندې تورن وي