طاهر خان له اسلام اباده

	ملگري ملتونه او پاکستان وايي د ژمې له تيريدو وروسته د افغان کډوالو د ستنيدو بهير بيرته گړندى شوى دى .

UNHCR د يخ موسم له ځنډ وروسته په خپله خوښه د افغان کډوالو د ستنيدو پروګرام د مارچ په لومړۍ نيټه يو وارې بيا شروع کړ.

اسلام اباد کې د دوشنبې په ورځ په خپور شوي يو بيان کې د ملګرو ملتونو د کډوالو ادارې وويل چې تيره مياشت د صوبه سرحد څخه ٥٢١٨، بلوچستان نه ١٨٤٠ ، جنوبى سيند صوبې نه ١٤٤٢ او د پنجاب او اسلام اباد څخه ٣٦٢ کډوال ستانه شول .

د پاکستان افغانستان او UNHCR ترمينځه د افغان کډوالو خپل هيواد ته په خپله خوښه د ستنيدو د پروګرام ترمخه د روان کال د مارچ د ستنيدو اخري مياشت وه ولې وروسته دا موده د روان کال تر دسمبره وغځول شوه .

ملګري ملتونه وايي چې د سفري اسانتياو لپاره هرې کورنۍ ته د ٤ او ٣٧ ډالرو ترمينځه پيسې ورکوي ،دې سره سره هر يو کس ته ١٢ ډالره مرستې هم ورکړې کيږي .
د درې اړخيزه کميشن تر تايد وروسته پاکستاني چارواکو په بلوچستان کې د ګيردي ځنګل او ځنګل پير علي زى او په صوبه سرحد کې د کچه ګړۍ او جلوزو د کيمپونو د اپريل له ٣٠ نيټې څخه د تړلو پريکړه کړې ده .

دې کيمپونو کې اوسيدونکو کډوالو ته ويل شوي دي چې بلوچستان کې د محمدخيل او صوبه سرحد کې نورو ١٠ کيمپونو ته منتقل شي .

UNHCR وايي چې تيره مياشت د دې کيمپونه څخه ٦٠٠ کډوال ستانه شوي دي او پاتې شاوخواه ٢٥٠ زره کډوالو د منتقل کيدو په اړه هيڅ پريکړه نه ده کړې .

د UNHCR بيان وايي چې د ادارې په مرسته په ٢٠٠٢ کال کې افغانستان ته د واپس ستنيدو د پروګرام ترمخه تر اوسه ٢.٧ميليون افغانان ستانه شوي دي
UNHCR وايي چې اوس هم ٢.٦ ميليون کډوال پاکستان کې اوسيږي