د بلخ ولايت په مرکز مزار شريف کې په دې وروستيو کې يو شمير بريدونه شوي چې د ځايي خلکو په وينا يې سوله ييز چاپيريال خراب کړى دى .

د پوليسو په وينا دغه بريد د مزار شريف د ښار په څنډو کې له امنيتي کمربنده دباندې شوې ده چې يوازې بريد کوونکى پکې وژل شوى دى .

د بلخ ولايت پوليس زياتوي چې د اوس لپاره يې پلټنې پيل کړي دي او نور معلومات لا نشته .

دغه چاودنه پر ځايي وخت د ماښام د شپږو بجو شاوخوا وشوه . دا په دې وروستيو کې په بلخ ولايت کې څويم بريد دى چې ترسره کيږي .

په يوۀ بل خبر کې د لغمان ولايت يو ولسوال په هغۀ غلچکي بريد کې وژل شوى دى چې چارواکي يې پړه پر طالب اورپکو اچوي .

نن د افغانستان د خوست په ولايت کې هم د يوې چاودنې خبر ورکړل شوى دى چې د چارواکو په وينا پکې درې کسان ټپيان شوي دي .

دغه راز د هلمند په ولايت کې هم د پوليسو د يوۀ چارواکي د وژنې او کندهار کې د يوۀ ځانمرگي بريد خبر ورکړل شوى دى .