چاودنه په داسې سيمه کې شوې ده چې ډير کله پکې گڼه گوڼه وي .

په دغې چاودنې کې چې نن د سه شنبې په ورځ ( د کب ٨ د مارچ ٢٨ ) په ځايي وخت د مازديگر پر شاوخوا پنځه بجې وشوه يو کس ووژل شو او ١٦ تنه نور پکې ټپيان شول .

د پېښور يوۀ لوړ پوړي پوليس افسر سيد وزير خبريالانو ته وويل چې په ټپي شويو کسانو کې ډيره برخه د افغان کډوالو ده .

چاودنه د ښار په زړۀ کې د سکارنو څلور لارې ته نژدې وشوه چې د شعبه بازار په نامۀ هم ياديږي .

دغلته گڼ شمير دوکانونه او هوټلونه دي چې خورا ډيره گڼه گوڼه پکې وي .

د پېښور پوليس وايي دا لا معلومه نه ده چې بريد کوونکي همدا ځاى په نخښه کاوۀ که يوۀ بل ځاى ته روان و .

پوليس افسر سيد وزير وايي بم په يوۀ موټر سايکل کې اېښودل شوى و او داسې ښکاري چې بم اېښودونکى تر چاودنې وړاندې تري تم شوى دى .

په پېښور کې د ترهگرو بريدونو د ويرې له امله پرون د متحدو ايالاتو کونسلېټ هم تر نامعلومه وخته پورې وتړل شو .