ارش پاکطين له کابله

	پرون په مزار شريف کې گڼ شمير کسانو مظاهره وکړه او ويې ويل چې نړيوال فشارونه بايد د عبدالرحمن په قضيه کې ونه منل شي .

د افغانستان لويه څاروالي وايي چې خوشې شوى عبد الرحمن رواني ناروغ وو. خو لاهم د هغه د ناروغۍ په اړه څيړنې روانې دې.

عبدالرحمن اوس مهال په کابل کې دى او چارواکي وايي چې هغه له نړيوالې ټولنې څخه په بهر کې د استوگنې غوښتنه هم کړى ده.

د افغانستان لويې څاروالۍ د عبدالرحمن د خوشې کيدو امر د هغه د رواني ناروغۍ دليل په مخې ته کولو صادر کړى دى.

د لويې څارنوالۍ مرستيال محمد اسحق الکو بي بي سي ته وويل چې عبدالرحمن په رواني ناروغۍ اخته وو او دوى د قانون له مخې خوشي کړى دى.

ښاغلي الکو زياته کړه عبدالرحمن به د ملگرو ملتونو د نړيوالې ټولنې له لورى د صحي څيړنو په موخه له هيواد څخه بهر وليږدول شي.

هغه زياته کړه عبد الرحمن اوس مهال په کابل کې دى او که چيرې د نوموړي دغه ناروغي ثابته نه شې نو دى به بيرته محاکمې ته را وغوښتل شي.

په کابل کې د ملگرو ملتونو د نړيوال سازمان وياند ادرين ادوارد وايي کيدې شي د عبدالرحمن د کډوالۍ غوښتنه د دغې ادارى له لورې ومنل شي.