طاهر خان له اسلام اباده

	پاکستاني پوځيان وايي لومړى بريد پر دوى وشو .

د پاکستان د پوځ وياند تورن جنرال شوکت سلطان وويل چې پاکستاني پوځ عمليات تيره شپه ( د وري ٣-٤ مارچ ٢٣-٢٤ ) درې بجې د شمالي وزيرستان په توت نرۍ کې له هغې وروسته وکړو چې اورپکو د پاکستان د امنيتي ځواکونو په يو مرکز د توغندو بريد وکړ.

د اورپکو په حمله کې يو پاکستانى عسکر مړ او پنځه نور ژوبل شول.

د پاکستان د پوځ وياند وويل چې دوى د معلوماتو ترمخه د ١٥ نه تر ٢٠ پورې جنګيالي وژلي شوي دي.

هغه زياته کړه چې وژلي شويو کسانو کې بهرنيان هم شامل دي.

تورن جنرال شوکت سلطان وويل چې ځينو اورپکوله تېښتې وروسته د راکټو په شمول درنه وسله پر ځاى پرېښوده.

تازه پوځي عمليات د ولسمشر جنرال پرويز مشرف له هغې خبردارۍ يوه ورځ وروسته ترسره شوي دي چې پکې نوموړي بهرنيو شکمنو کسانو ته د پاکستان نه د وتو غږ کړى و.

د پنجشنبې په ماښام لاهور ښار کې د پاکستان د ملي ورځ په مناسبت يوې جلسې ته خپله وينا کې جنرال مشرف وويل چې که چرې بهرني شکمن کسان د پاکستان نه ونه وتل نو د منځه به يوړلى شي.

پاکستاني پوځ وايې چې د مارچ د لومړۍ نېټې نه شمالي وزيرستان کې د شکمنو په ضد علمياتو کې شاوخوا ١٤٠ جنګيالى وژل شوي دي.

که يو خوا پاکستانى پوځ د وزيرستان په قبايلى سيمه کې د بهرنيو اورپکو د موجودګۍ خبره کوي خو د شمالى وزيرستان نه د ملي اسمبلۍ غړى مولانا نيک زمان وايي چې پوځي عملياتو کې بعضې وخت عام خلک په نخښه کيږي.