غزل اکمل له کابله

	افغان دولت وايي له کابله وروسته به په ننگرهار او ځينو نورو ولايتونو کې هم د چرگانو پر وژنې لاس پورې کوي .

د افغانستان دولت په همدى موخه دغې ادارې ته ٥٠٠ زره امريکايي ډالره په واک کې ورکړي دي .

سربيره پر دې د ملگرو ملتونو د خوراک او کرنې سازمان او په افغانستان کې د امريکې په مشرۍ ايتلافي ځواکونه هم په دغه چاره کې مرسته کړې ده .

د افغانستان د کرنې وزارت د حيواني روغتيا د ادارې مشر عزيزاله عثماني وايي چې دوى د کابل په لويديځ کې د دشت برچې په سيمې کې د چرگانو په وژلو پيل کړي دى او هڅه کوي د يوې اوونې په ترڅ کې د دغى سيمې ټول ناروغه مرغان له منځه يوسي .

ښاغلى عثماني زياتوي چې د مرغانو د والگي دوه پيښې د کابل په خيرخانې مينې کې او دوه نورې يې په قصبې او چهار قلعه کې هم ليدل شوي چې دوى غواړى ژر تر ژره په دغو سيمو کې هم د چرگانو کنټرول او وژنه پيل کړي .

هغه وايي چې چرگان وروسته له وژلو ښخوي او خاوندانو ته يې په بدل کې پيسى ورکول کيږي .

ددشت برچي اوسيدونکو د دولت ددغه کار ستاينه کړى ده .

د افغانستان د کرنې وزارت چارواکي وايي چې د مرغانو د والگي په مقابله کې د ځينو طبي وسايلو له کمښت سره مخامخ دي او د خير ښيگڼو ټولنو مرستې ته اړيتا لري چې وکولاى شي د افغانستان په ولايتونو کې په ځانگړې توگه ننگرهار ، لغمان او کونړ کې هم ژر تر ژره دغه کار پيل کړي .

څه موده وړاندې د افغانستان د مړو او ناروغو مرغانو بيلگې ايټاليې ته ليږدول شوې وې او له څيړنو وروسته جوته شوه چې د مرغانو خطرناک ايچ ٥ اين ١ ډوله والگى چې انسانانو ته هم گواښ پېښوي ، د افغانستان په ځينو سيمو کې هم شته دى .