کوکنار

د نشه يي داروگانو په وړاندې د مبارزې په برخه کې دکورنيو چارو مرستيال وزير ، جنرال محمد داود د هلمند په ولايت کې د سيمه ييزو چارواکو او بزگرانو يوې غونډې ته د وينا په مهال وويل دولت کلک هوډ لرى چې په درست هيواد کې د کوکنارو کروندې واړوي .

ځکه چې دده په وينا ، نشه يي توکي تره گر او جنايي ډلې پياوړې کوي ، د فساد لمن پراخوي او په هيواد کې د ټولنيز او اقتصادي بيارغونې مخه نيسي .

د هلمند په گډون ، د افغانستان په هغو ولايتونو کې چې د کوکنارو کروندې په کې شنې شويدي ، له ١٢ ورځو راهېسې ، د کوکنارو د کروندو د اړولو لړې پيل شويده .

د هلمند والي انجينير داود وايي د دغه ولايت د ديشو ، خان نشين او نورو ولسواليو کې دکوکنارو پراخې کروندې ېې اړولې دي .

ښاغلي داود زياته کړه چې د کوکنارو د کروندو اړول او د نشه يي داروگانو په وړاندې مبارزه ، د قانون د پلي کولو مهمه برخه ده چې دده په وينا دوى به په دې برخه کې تر خپل وس اغيزمنې هلي ځلي وکړي .

د افغانستان ولسمشر حامدکرزي څو ورځې وړاندې ، په کابل کې د افغان بزگرانو يوې پراخې غونډې ته د وينا په مهال ، نشه يي توکي د افغانستان لپاره يو داغ وباله او له بزگرانو يې وغوښتل چې دکوکنارو له کرلو څخه په لاس اخيستو سره د افغانستان له لمنې دغه داغ ليرى کړي .

افغان ولسمشر بزگرانو ته لارښونه وکړه چې د کوکنارو پر ځاى نورو غلو دانو او د ميوو رزولو ته چې نړيوال ېې ډير خوښوي ، مخه وکړي .

خو بزگران شکايت کوي چې تر دې مهاله ، دولت او نړيوالې ټولنې له دوى سره داسې کومه مرسته نده کړي چې دکوکنارو پر ځاى دوي ته د ژوند نورې لارې چارې پرې برابرې شوې واى .

په همدې حال کې دکرنې وزېر عبيدالله رامين بزگرانو سره ژمنه کړيده چئ بزگرانو ته د اسانتياوو د برابرولو لپاره به په راتلونکو پنځو کلونو کې څه باندي ٦٠٠ ميليونه ډالر د اوبو د بندونو پر جوړلولو ولگول شي.

داچې دکوکنارو د اړولو لپاره ، ددولت پيل شوې لړې به کومه نتيجه ورکړې ، يو شمير خلک پرې شک ښيي ځکه ددوى په وينا هرکال په دغه وخت کې دولت د کوکنارو د اړولو ډير ې خبرې کوي او هوډونه څر گندوي ، خو دکال په پاى کې د نشه يي توکو د توليد شوې کچې له پلوه ، افغانستان بياهم په سر کې پاتې وي.