حنان حبيب زى مزارشريف

	د افغانستان په شمال کې يو شمير کارخانې شته چې بيارغونې او پاملرنې ته اړتيا لري

د افغانستان سترې توليدي فابريكي چې په دولتي اډانه كې فعاليت كوي د جګړو په لسيزو كې يې ډير زيانونه ګاللي او ددې هيواد په بازارونو كې له بهر څخه له راليږدول شو توكو سره سيالي نشې كولى .

ددغې فابريكې ريس انجينر محمد شريف چې د بلخ ولايت د چارواكو د حساب وركولو د دومې اونۍ په لړ كې خبريالانو ته غږيده ټينګار وكړ چې د بلخ ولايت د ټوكر جوړولو فابريكه د له منځه تللو په حال كې ده او هر كال نژدې شل مليونه افغانۍ زيان ګالي .

ښاغلي شريف زياته كړه چې د فابريكي تخنيكي وسايل ډير زاړه شوي او بله دا چې دوى د بريښنا اسانتياوې هم په پوره ډول نه لري .دده په وينا ددې پر ځاى چې په افغانستان كې د ټوكر جوړولو صنعت ته وده وركړل شي له بهر څخه پر راليږدول شو توكو ډډه وهل كيږي چې دوى ته يې وايي سخت زيانونه وراړولي دي .

د بلخ ولايت د ټوكر جوړولو فابريكه د له منځه تللو په حال كې ده او هر كال نژدې شل مليونه افغانۍ زيان ګالي دبلخ ولايت د ټوکړ جوړولو فابريکې مشر ، انجينير محمد شريف

خو له دې ستونزو سره سره د بلخ ولايت د ټوكر جوړولو دفابريكې ريس هيله وښوده چې كه دولت وغواړي په ډيرو لږو پيسو يې فا بريكه د ښه توليد لپاره چمتو كېداى شي .

(( موږ ټول پوهيږو چې د ازاد بازار سيسټم په ټوله نړۍ كې يو منلى سيسټم دى .د ځمكې پر مخ يې ډير هيوادونه د پر مختګ په لور بيولي دي . موږ هم اړ يو چې وې منو .خو دا سيسټم خپل شرايط لري .موږ ډيرو لږو پيسو ته اړتيا لرو . نژدې لس مليونه افغانيو ته اړتيا لرو . كه دا پيسې د بلخ نساجۍ ته وركړل شي ، په لږ بدلون سره مونږ كولى شو چې د فابريكې اوه سوه اته اويا ماشينونه ژوندي كړو او فعاليت يې د ګټې وټې وړ وګرځي .كه زما دا خبره هم نه منل كيږي ، دولت بايد ټوله فابريكه خصوصي سكټور ته وسپاري چې له اوسني حالت څخه ووځو .))

د بلخ د ټوكو جوړولو د فابريكې تر څنګ په دغه ولايت كې د افغانستان د كيمياوي سرې يواځينۍ فابريكه چې د سرې او برښنا په نامه ياديږي هم له ورته ستونزو سره مخ ده .

د بلخ ولايت د اقتصادي چارو چارواكي وايي چې د فابريكې د تخنيكي وسايلو د زړښت له كبله يې توليد په څلورويشت ساعتونو كې له پنځه سوه ټنو څخه سل ټنو ته راټيټ شوى دى .

د افغانستان په شمال كې د بغلان ولايت صنعت هم د سيمه ييزو چارواكو په وينا له ورته ستونزو سره مخ دى . د غوري سيمنټ ، د پلخمري نساجۍ ، د قند فابريكه ،د پلخمري برښنا كوټونه ، د بغلان د سكرو كانونه او د كندوز ولايت سپين زر فابريكه يو مخ د چارواكو په وينا نوې ټينكنالوجۍ ته اړتيا لري چې د افغانستان په بازارونو كې يې توليد له ګاونډيو هيوادونو څخه له راليږدول شو توكو سره لږ تر لږه سيالي وكړى شي