حکيم سمسور کابل

	ښاغلي مجددي ددې بريد ملامتي د پاکستان پر استخباراتي ادارې ، آى اس آى ، باندې واچوله خو پاکستاني چارواکو سملاسي دا تور رد کړ او هغه ېې يوه بې بنسټه ادعا وبلله

په دغه بريد کې ښاغلي مجددي ته زيان ندى رسيدلى، خو ويل کيږي چې د بريد کونکو په گډون څلور کسان په کې وژل شوي او درې نور ژوبل شويدي .

ښاغلي مجددي د يو خبري کنفرانس په ترڅ کې ددې بريد ملامتي د پاکستان پر استخباراتي ادارې ، آى اس آى ، باندې واچوله خو پاکستاني چارواکو سملاسي دا تور رد کړ او هغه ېې بې بنياده ادعا وبلله.

په همدې ترڅ کې د افغانستان ولسمشر حامد کرزي هم په يوخبري کنفرانس کې دا بريد په کلکه وغنده او و ې ويل چې د څو مياشتو راهېسې حکومت دا سې اطلاعات درلودل چې د هيواد د لوړو شخصيتونو د وژلو پلانونه جوړ شوي ، خو ښاغلي کرزي د کوم ځانگړي هيواد نوم وانخيسته .

د افغانستان د مشرانو جرگې د ريس او افغان جهادي مشر صبغت الله مجددي د سپرلي پر گاډي ددغه ځان مرگي بريد زورورې چاودنې د کابل د ښارلوېدېزې برخې ولړزولې .

د ښاغلي مجددي د يوه ساتونکي له خولې چې دوه تنه ځان مرگي بريدکونکي ، خپل کرولا موټر هغه مهال چې د ساتونکو له گاډي مخکي کړ ، سملاسي دښاغلي مجددي د سپرلي له گاډي سره نژدي وچوه .

په بريد کې ښاغلي مجددي ته زيان ندى رسيدلى ، خو د کورنيو چارو وزارت وياند يوسف ستانيزى وايي چې د دوه تنو ځانمرگو بريد کونکو په گډون ،څلور تنه په کې وژل شويدي .

وژل شوي کسان ، لارويان دي چې يو ېې ماشوم دى

په بريد کې دري تنه نور ټپيان شوي هم دي چې روغتون ته ددرملني لپاره ليږدول شويدي

بريد يکشنبې د سهار په ٩ بجو او ديرشو دقيقو د کابل ښار په لويديز کې د پوليتخنيک انستيتوت مخامخ د باغ بالا پر سړک هغه مهال وشو چې ښاغلي مجددي ، د سولي د غښتلتيا او پخلايني د کميسيون دفتر ته روان وو.

په تير ېوه کال کې دى ، ددغه کمېسېون مشري کوي چې په هلو ځلو سره ېې ، د پخوانيو طالبانو ، اسلامي گوند او نورو مخالفانو څه باندي زر کسان له مخالفت نه لاس اخيستى او په هيواد کې د سولې او پخلاينې له بهير سره يو ځاى شويدي .

د بريد په سيمه کې وژل شويو کسانو او د دوه تنو ځانمرگو بريدکونکو د وجود ټوټي هرې خوا ته خورې ورې پرتې وي .

په بريد کې د ښاغلي مجددي ويجاړ شوي گاډي په سيمه کې پروت و او امنيتې ځواکونو سيمه کلابند کړي وه .

د ځان مرگو بريد کونکو هويت تر اوسه ندى څرگند شوي ، خو ځانگړي پوليسو د هغوي د پيژندنې لپاره پلټنې پيل کړيدي .

په ورستيو څو مياشو کې افغانستان کې شاوخوا ٢٧ ځانمرگي بريدونه شويدي .

ولسمشر حامد کرزي ويلي دي چې ددغو بريدونو تر شاه د بهرنيانو لاس دى