طاهر خان له اسلام اباد څخه

	بېنظير بوټو وويل چې پيپلز ګوند د اسلام آباد او کابل ترمينځه د اړيکو په خرابيدو ډيره انديښمنه ده.

اسلام آباد کې د بېنظير بوټو د پيپلز ګوند د دفتر څخه په خپرې شوې يوې بيانې کې بېنظير بوټو وويل چې پاکستان کې د شکمنو طالبانو د موجودګۍ په اړه د افغانستان انديښنې په پام کې د نيولو په ځاى ولسمشر جنرال مشرف د افغان ولسمشر پر څرګندونو ملنډې وکړې.

د افغانستان او پاکستان ترمينځه د طالبانو د يو لسټ په اړه د تودو بيانونو تبادله دوام لري .

بېنظير بوټو وويل چې پيپلز ګوند د اسلام آباد او کابل ترمينځه د اړيکو په خرابيدو ډيره انديښمنه ده.

بېنظير بوټو په جنرال مشرف غږ وکړ چې د شکمنو کسانو په اړه معلومات بې ځايه بللو په ځاى دې په خپلو پاليسو له سره غور وکړي.

د پيپلز ګوند مشرې وويل چې د جنرال مشرف حکومت د طالبانو د بيا منظم کيدو په مخنيوى کې پاتې راغلې دى چې دا د طالبانو له خوا شمالي وزيرستان کې په حکومتي ودانيو د طالبانو له قبضې وروسته ثابت شو .