حنان حبيب زى مزارشريف

	فرحناز يوسفي د سندرو ويلو په سيالۍ کې د ١٠٠٠ کسانو په منځ کې پنځم مقام ترلاسه کړ

كه څه هم په ټولنه كې له نارينه ګانو سره د خپلو حقونو د انډول لپاره د ميرمنو په وړاندې ډير ې ستونزې پر ځاى پاتې دي . خو د ډاكټر نجيب الله له واكمنۍ وروسته دا لومړى ځل دى چې يوه افغانه پيغله د موسيقۍ په سيالۍ كې د زر تنو ځوانانو تر منځ پنځم ځاى خپلوي او ددې په وينا د زياتو ګواښونو سره سره د موسيقۍ په يوې سختې سيالۍ كې ګډون كوي .

١٧ كلنې فرحناز يوسفي د افغانستان په پلازمينه كابل كې د موسيقۍ په يوې ټوليزې سيالۍ كې د زر تنو ځوانانو له منځه د (( غوره افغانې پيغلې )) نوم تر لاسه كړ .

دا د مزار شريف اوسيدونكې ده . اغلې يوسفي په ټولنه كې د ميرمنو په وړاندې پراته خنډونه او ديوالونه مات كړل او د سلګونو نندارچيانو په وړاندې د سټيج پر سر راڅرګنده شوه او په يوه سيالۍ كې يې د موسيقۍ مينه والو ته څو ژوندۍ سندرې واورولې .

د افغانستان په تاريخ كې د لومړي ځل لپاره ميرمن پروين د افغان ښځو په وړاندې د توپير دغه كړۍ ماته كړې وه . په كال ۱۹۵۱ ميلادي كې چې چادري يې هم پر سر وه د افغانستان د راډيو له څپو يې يوه سندره واوروله .خو اوس چې له هغې مودې څه له پاسه پنځه لسيزې تيريږي په لسګونو ښځينه سندرغاړې د افغان موسيقۍ په ډګر كې راښكاره شوې چې ځنې يې ډيرې مشهورې هم دي .

خو د مجاهدينو او بيا د طالب واكمنۍ پر مهال د ورته سندر غاړو د پرمختګ څه چې د راڅرګنديدو مخه ونيول شوه . په افغانستان كې د جګړو وروستۍ لسيزه چې نيمه يې د مجاهدينو واكمنۍ او نيمه يې د طالبانو واكمنۍ بشپړه كړه .

	د فرحناز مور او پلار وايي د خلکو خبرې نشي ځغملى او نه غواړي نورې لوڼې يې سندرې ووايي

نه يواځې ښځينه بلكې نارينه هغو هم ونشو كړى چې دننه په هيواد كې خپل هنر وښيي .د موسيقۍ په وړاندې د طالبانو د سخت دريځ اغيز د هغوى د واك د نسكوريدو وروسته هم له افغان ميرمنو دا جرت واخيست چې د سلګونو نندارچيانو په وړاندې خپل هنر وښيي .خو فرحناز يوسفي د ويرې دغه ځنځير مات كړ. اغلې يوسفي بي بي سي ته په دې اړه وويل .

(( د يوې افغان پيغلې په توګه چې پر سړك ګرځېدم ، د ځنې خلكو فكرونه بيل دي . له بدو خبرو چلندونو سره مخامخ كېدو . احساس مې دا ؤ چې افغانې پيغلې او ميرمنې په افغانستان كې هيڅ ونډه نه لري . ګواښونه هم راته وشول .نه يې غوښتل چې يوه افغانه ميرمن دې په داسې يوه سيالۍ كې ونډه واخلي . دا يې بده ګڼله .))

دې بدلون ته په پام سره ډيرى افغانان په دې اند دي چې له كلونو كلونو جګړو او بنديزونو څخه وروسته افغان ميرمنو د ژوند په هر ډګر كې د پرمختګ وس پيدا كړى دى .

د فرحناز مور و پلار هم ددغو ستونزو يادونه وكړه خو ټينګار يې داؤ چې نه غواړي ښځينه ماشومان يې د ټولنې د ډيرو نورو وګړو په څير يواځې د كور په پخلنځي كې كار وكړي