په لاهور کې انگلستان خپل پياوړى دريځ له لاسه ورکړ .

انگلستان لومړى د منډې جوړولو پيل وکړ او د غرمنۍ تر وقفې پورې يې ١٠٠ منډې کړې وې او هيڅ لوبغاړى يې نه و سوځيدلى .

داسې ښکاريده چې انگريز لوبغاړي به د ورځ په پاى کې په خورا ښه دريځ کې وي خو تر وقفې وروسته سملاسي کپتان ووان د ٥٨ منډو په جوړولو وسوځيد او ورسره پرله پسې درې نور لوبغاړو هم ستانۀ شول .

د انگلستان لپاره يوازې کولن کالينورډ وکولاى شول چې د پاکستاني لوبغاړو ښه مقابله وکړي . دۀ ٧١ منډي کړي او تر اوسه سوځيدلى نه دى .

د پاکستان له لورې يونس خان او شاهد اپريدى په دې لوبه کې برخه نه لري .

شعيب ملک د درو انگريز لوبغاړو په سوځولود لومړنۍ ورځې غوره بالر گرځيدلى . که چيرې انگلستان په دويمه ورځ ډيرې منډې ونه کړي نو د درو لوبو د دغې لړۍ په برابرولو به ونه توانيږي .

پاکستان د دغې لړۍ لومړنۍ لوبه چې په ملتان کې شوې وه په ٢٢ منډو گټلې وه .