خپلواک ساپى کابل

	افغانستان کې تراوسه ٥٠٠٠٠ تنه ملي پوليس روزل شوي

له افغانستان سره د امريکې د امنيتي همکارۍ د دفتر مشر تورون جنرال جان برينن وويل په پام کې ده چې دغه پيسې د پوځ په روزلو سربيره دملي پوليسو په مسلکي روزنه ،وسلو وسايلو او د پوليسي مرکزونو او ستشنونو په جوړولو ولگول شي .

د پوليسو د مياشتنۍ تنخواه ډيريدل هم د اصلاحاتو يوه مهمه برخه بلل کيږي . په ټوله کې د مرستو هدف د امنيت له اړخه په خپلو پښو د افغانستان دريدل ښودل شويدي .

په افغانستان کې د پوليسو په اصلاحاتو او ريفورم کې د امريکې مخامخ ورگډيدل يو نوى پرمختگ دى .

د روان کال تر نيمايې پورې دغه چاره د المان او برتانيې په غاړه وه . خوله تير جولاې راهيسې امريکا نه يوازې د خپلو دغو متحدينو لاسنيوي ته وردنگلي بلکې اوس داسې بريښي چې د پوليسو د ريفورم د پلي کيدو ډير بار يې هم په خپله غاړه اخېستى دى .

د افغانستان لپاره د متحدو ايالاتو د امنيتي همکارۍ د دفتر مشر تورن جنرال جان برينن د دوشنبې په مازديگر خبريالانو ته وويل چې هيواد يې د افغانستان لپاره د پوځ د روزلو تر څنگه په دې برخه کې هم پراخو مرستو ته ژمن دى .

جنرال برينن د دغو مرستو دقيقه اندازه ونه ښوده خو دا يې د راتلونکو څو کلونو دننه په ملياردونو ډالر وبلل .
((متحدو ايالاتو يوازى په روان کال کې د افغانستان د ملي پوځ او پوليسو په ريفورم له يو مليارد نه ورزيات ډالر لگولي دي . په همدي کچه لگښت به د راتلونکو څو کلونو لپاره دوام وکړي او دا به په ټوله کې ملياردونه ډالر وي ))

د ملي پوليسو په تړاوو يوه لويه نيوکه د پوځ په تناسب د پوليسو د مياشتنۍ تنخواه د کمي له اړخه ده .
خو جنرال برينن وايې چې د تشکيلاتي اصلاحاتو له پلي کيدو سره يو ځايې چې پيل يې تيره اونۍ د کورنيو چارو وزارت د ٣٠ لوړ رتبه جنرالانو گمارل وو، د تنخواه رفورم هم د پلي کيدو په حال کې دى .

ده په دي اړه ولسمشر کرزي ته د يوه پلان د ورمخې ته کولو خبره هم وکړه . دا ډول يې په نوي نورم د پوليسو د تنخواه د ويش پيل د ولسمشر له لورې د همدغه ورمخې ته شوي پلان له لاسليک کيدو سره جوخت وباله .
((ډير ژر به موږ ووينو چې د ملي پوځ او پوليسو مياشتنۍ تنخواه به سره مساوي شي .))

په مياشتنۍ تنخواه سربيره د د هيواد په کچه د پوليسو د اوو سيمه يزه قوماندانيو ، روزنيزو مرکزونو او پوليسي ستيشنونو جوړول او د وسلو ، مهماتو ، سامان الاتو او وسايطو له اړخه د پوليسو پراخ لوژيستيکي اکمالات هغه څه دي چي د ښاغلي برينن په وينا امريکايان يې د راتلونکو څو کلونو لپاره د لگښت ورکولو ته چمتو دي .

جنرال برينن دا هم وويل چې د پوليسو د اړتياوو او اکمالاتو په سلو کې ٥٠ به د راتلونکوشپږو يا نهو مياشتو په موده کې پوره شي .

د افغانستان لپاره د ملي پوليسو ټول شمير د ٦٠ زرو په شاوخوا کې ښودل کېږي چې د چارواکو په وينا له دې نه شاوخوا ٥٠ زره کسانو لومړنۍ روزنې ليدلې او اوس تر اساسي روزنې لاندې نيول کيږې .

ها خوا د ملي پوځ شمير ٧٠ زره ټاکل شوچې له مينځه يې تر اوسه ٣٠ زره کسان روزل شوي او د پلان له مخې به يې پاتي ٤٠ زره کسان د ٢٠٠٧ م کال تر پايه وروزل شي .

د امريکايانو او د هغوې د متحدينو باور دادى چې د روزلي پوځ او پوليسو په رامينځ ته کيدو سره به افغانستان له امنيتي اړخه په خپلو پښو ودريږي او په دې تړاوو به له دې اړخه د دوې له اوږې نه اوسنى پيټى سپک شي .