په فيصل اباد کې ډيرې نندراچيانې ښځې وې دوى لاس په دعا دي چې پاکستاني لوبغاړي به دغه لوبه ونه بايلي .

د انگلستان لوبډله په خپله لومړنۍ پاڼۍ په ٤٤٦ منډو وسوځيده چې کوربه هيواد ته يې د ١٦ منډو لاسبرى ورکړ .

په ځواب کې تر اوسه پورې پاکستان په خپلې دويمې پاڼۍ کې د شپږو لوبغاړو په سوځيدو ١٨٣ منډې کړي دي . له دې سره پاکستان ټول ټال ١٩٩ منډې وړاندى دى .

پاکستان په خپلې لومړنۍ پاڼۍ کې ٤٦٢ مندې وکړې چې په هغو کې د کپتان انضمام الحق ١٠٩ منډې او د شاهد اپريدي ٩٢ منډې د پام وړ وې .

د انگلستان له لورې کيوون پيټرسن او اين بېل سليزې وکړې . خو د انگلستان ټوله هيله به په پنځمه ورځ ژر تر ژره د پاکستان د پاتې څلورو لوبغاړو سوځول وي .

که چيرې انگلستان پاتې پاکستاني لوبغاړي ژر وسوځوي او ټاکلى هدف ترلاسه کړي نو د درو پنځه ورځنيو لوبو لړۍ به يو يو مساوي کړاى شي .

پاکستان په لومړنۍ پنځه ورځنۍ لوبه کې انگلستان ته په ٢٢ منډو ماتې ورکړې وه .