ستر جنرال رحيم وردگ ( ښي لاسته ) وايي القاعدې خپل بريدونه گړندي کړي دي .

دۀ دا هم وويل چې اورپکو نوې پيسې هم ترلاسه کړي دي .

ښاغلي وردگ وويل ځينې عرب او نور بهرني اورپکې افغانستان ته ورغلي چې ځانمرگي بمي بريدونه وکړي .

د دفاع د وزارت له وياند جنرال ظاهر اعظمي له بي بي سي سره په مرکه کې له دې ناخبري وښووده چې القاعدې او نورو اورپکو ته به دغه نوي وسايل او پيسې چا ورکړې وي .

په کابل کې ځينې سرچينې په دې باور دي چې ځينو گاونډيو هيوادونو کې ښايي ځينې کړۍ په دې چاره کې لاس ولري .

د افغانستان د دفاع وزير دا خبرې په داسې وخت کې شوي چې په کابل او کندهار کې ځانمرگو بمي بريدونو په تيرو څو ورځو کې يو شمير کسان ووژل .