دغه ځوانان د تېر يوه كال راهيسې د پرخې په نامه يوه دوه مياشتنۍ مجله هم خپروي .

د پرخې وروستۍ ګڼه په خورا ښكلې بڼه او رنګه پښتۍ له چاپه راوتلې ده .

د پرخې د امتياز خاوند او د بلخ پوهنتون استاد محمد فاروق خپلواك وايي چې دوى به خپله مجله او ادبي فعاليتونه نور هم پراخ كړي او د داسې اسانتياو د برابرولو په لټه كې دي چې د سيمې د ليكوالو او شاعرانو كتابونه هم په مشاعرو كې له كركتنو وروسته چاپ كړي .

د بلخ ولايت په مرکز مزار شريف کې اوونيزې پښتو مشاعرې کيږي .

ټاكل شوې ده چې د بلخ پوهنتون په انګړ كې د (( ډال )) په نامه يوه پښتو جريده هم د شمال د هغو ځوانانو له خوا د لومړي ځل لپاره خپره شي چې د شمال د ادبي بهير غړي دي .

د بغلان په ولايت كې بيا د بغلان ادبي بهير په نامه د سيمه ييز شاعر او ليكوال عبدالستار سعادت په زيار د تېرو څو مياشتو راهيسې ورته فعاليت پيل كړى .

ددې بهير له نامه هره اونۍ ادبي او كلتوري غونډې د بهير په تالار كې تر سره كيږي او ددغه ولايت د شعر او ادب ګڼ شمېر مينه وال په كې برخه اخلي .

دا بهير ښه ښايسته كتابتون هم لري . په كتابتون كې يې ادبي ، كلتوري ،ټولنيز ، سياسي او تاريخي كتابونه د لوستلو لپاره ايښول شوي دي .

په دغه ولايت كې د لومړي ځل لپاره د (( پسرلي ) ) په نامه يوه دوه مياشتنۍ مجله له چاپه راووته
ددې مجلې د امتياز خاوند ذبيح الله احساس دى او نوموړى وايي چې هڅه كوي راتلونكې ګڼې يې په ښه او رنګه صحافت له چاپه راوباسي .

د کندز له ولايته بيا د سوغات په نامۀ يوه مهالنۍ ورځپاڼه خپريږي چې د امتياز خاوند يې گل رحيم نيازمند ، مسوول چلوونکى يې عزت الله پامير او مرستياله يې اغلې مرضيه ده .