افريقايي هيوادونه وايي دوى خپلو بزگرانو ته سبسډي نه ورکوي نور دې يې هم نه ورکوي .

د بورکينا فاسو پلاوي موسى نبي بي بي سي ته وويل د دۀ په نظر د سوداگرۍ د نړيوالې ټولنې له تيرې غونډې راهيسته چې دوه کاله وړاندې په مکسيکو کې وه د مالوچ توليدونکو هيوادونو لپاره د سوداگرۍ په برخه کې هيڅ پرمختگ نه دى شوى .

دۀ وويل ډيرې غونډې شوي خو کومه پخه پريکړه پکې نه ده شوې . موسى نبي وويل افريقايي مالوچ توليدونکي د صادراتو د سبسديو ختميدۀ غواړي .

دۀ وويل د افريقا ،. کرابين او پاسفيک هيوادونه نه غواړي چې خپلو بزگرانو ته سبسډۍ ورکړي ، دوى له شتمنو هيوادونو غواړي چې د سوداگرۍ د نړيوالې ټولنې له قوانينو سره سم هغوى هم خپلو بزگرانو ته سبسډۍ ورنه کړي .

بل پلو د اروپايي ټولنې د سوداگرۍ کمشنر پيټر منډلسن ويلي راتلونکې اوونۍ به د سوداگرۍ د نړيوالې ټولنې له مهمو غړيو سره خبرې اترې به په دې مهمې وي چې په دسمبر کې به د سوداگريزو خبرو اترو د بل پړاو پايله معلومه کړي .

ښاغلي منډلسن وويل که چيرې د دوحې سوداگريز تړون پرمختگ کوي نو د دې اړتيا شته چې په خبرو اترو کې ټولې غاړې له څه تيريدو ته چمتو وي .

دۀ وړانديز وکړ چې ټولې غاړې دې د دۀ په وينا له وړو خبرو تير او لوى تصوير وگوري چې په هغو کې د کار او توليد سيکتورونه هم شامل دي او دغه راز د کرهڼې اوواردولو محصول پکې شته چې د لانجې تر ټولو مهمه برخه ده .